Iravaban.net–ը ուսումնասիրել է Իրավական ակտերի նախագծերի հրապարակման միասնական հարթակում հանրային քննարկման ներկայացված և Արդարադատության նախարարության կողմից մշակված նախագիծը, որով առաջարկվում է փոփոխել «Քրեակատարողական ծառայության մասին» օրենքում լրացում կատարելու մասին 2024 թվականի օրենքը և խաղային գործունեությանը մասնակցելու գործող սահմանափակումը տարածել քրեակատարողական ծառայության համակարգում աշխատող բոլոր հանրային ծառայողների վրա։
Ի՞նչ է գործում այսօր
2024 թվականին օրենքում սահմանվել է, որ քրեակատարողական ծառայողին արգելվում է մասնակցել «Խաղային գործունեության կարգավորման մասին» օրենքով նախատեսված խաղերին։
Բացառություն է նախատեսված միայն օպերատիվ-հետախուզական միջոցառումների շրջանակում մասնակցելու դեպքերի համար։
Իսկ ո՞ւմ վրա չի տարածվում սահմանափակումը
Գործող կարգավորումը վերաբերում է քրեակատարողական ծառայողներին, սակայն քրեակատարողական համակարգում աշխատում են նաև այլ հանրային ծառայողներ, այդ թվում՝ քաղաքացիական ծառայողներ։
Նախագծի հեղինակների գնահատմամբ՝ սա կարող է խնդրահարույց լինել, քանի որ այդ անձինք նույնպես աշխատում են նույն անվտանգային միջավայրում և որոշ դեպքերում ներգրավված են դատապարտյալներին վերաբերող կարևոր գործընթացներում։
Ի՞նչ գործընթացների են մասնակցում քաղաքացիական ծառայողները
Ըստ նախագծի հիմնավորման՝ քրեակատարողական ծառայության համակարգում որոշ քաղաքացիական ծառայողներ մասնակցում են, մասնավորապես՝
- դատապարտյալին պայմանական վաղաժամկետ ազատելու վերաբերյալ գործընթացներին,
- պատժի կրման անվտանգային գոտու տեսակը փոխելու գործընթացներին,
- համապատասխան փաստաթղթերի կազմմանը,
- դատապարտյալների բողոքների վերաբերյալ դատական գործընթացներին՝ որպես քրեակատարողական ծառայության ներկայացուցիչներ։
Այսինքն՝ նախագծի տրամաբանությամբ՝ նրանց գործունեությունն ու քրեակատարողական ծառայողների աշխատանքը որոշ դեպքերում կարող են նույն անվտանգային ռիսկերի շրջանակում լինել։
Ի՞նչ է առաջարկվում
Նախագծով առաջարկվում է «Քրեակատարողական ծառայության մասին» օրենքում լրացում կատարելու մասին 2024 թվականի ՀՕ-278-Ն օրենքում «Քրեակատարողական ծառայողին» բառերը փոխարինել «Քրեակատարողական ծառայության հանրային ծառայողներին» բառերով։
Արդյունքում սահմանափակումը կտարածվի ոչ միայն քրեակատարողական ծառայողների, այլև համակարգում աշխատող մյուս հանրային ծառայողների վրա։
Ինչո՞ւ է սա արվում
Նախագծի հեղինակների հիմնավորմամբ՝ նպատակն է կանխել խաղային գործունեությանը մասնակցության հետ կապված հնարավոր ռիսկերը և նույն համակարգում աշխատող հանրային ծառայողների համար սահմանել միասնական սահմանափակում։
Նախագծի ընդունման դեպքում լրացուցիչ ֆինանսական միջոցներ չեն պահանջվի։