Միացեալ Նահանգներու արտաքին գործոց նախարարի Մերձաւոր Արեւելքի հարցերով նախկին օգնական Տէյվիտ Շենքըր յայտնեց, որ Լիբանանի եւ Իսրայէլի միջեւ շրջագծային համաձայնութիւնը յառաջիկայ հոկտեմբերին որոշուած իսրայէլեան ընտրութիւններէն առաջ պիտի չվճռուի:
«Ներկայիս ընթացող ժողովներուն նպատակը միայն բանակցային հոլովոյթի շարունակութիւնը պահպանելն ու անոր տապալումը կանխարգիլելն է», նշեց Շենքըր:
«Լիբանանեան բանակէն կը պահանջուի ընդլայնել զգայուն շրջաններուն մէջ իր տեղակայումը եւ Հըզպալլայի վերատեղակայման արգելք ըլլալ», ըսաւ ամերիկացի նախկին պաշտօնատարը` աւելցնելով. «Այս առաքելութեան մէջ անոր յաջողութիւնը վճռական ազդակ պիտի ըլլայ Իսրայէլը իր բռնագրաւած շրջանէն աստիճանաբար հեռանալու մղելու մէջ»:
«Կը նախատեսուի, որ բանակցային յառաջիկայ փուլերուն ընթացքին գերիներու փոխանակում եւ կարգ մը շրջաններէ իսրայէլեան հեռացում տեղի ունենայ, սակայն ատիկա հոկտեմբերի ընտրութիւններէն առաջ տեղի պիտի չունենայ», շեշտեց Շենքըր:
«Միացեալ Նահանգները պէտք է առանցքային դեր խաղան լիբանանեան բանակի զգայուն շրջաններուն մէջ իր պարտականութիւնը կատարելէն վստահ ըլլալու համար ազդու ստուգման գործիքակազմի հաստատման մէջ` Իսրայէլը հեռանալու քաջալերելու նպատակով», ըսաւ ան:
«Լիբանանեան պետութիւնը պէտք է պետութեան գերիշխանութիւնը պարտադրէ եւ վերջ տայ իր որոշումին վրայ իրանեան տիրապետութեան, սակայն Թեհրան իր դաշնակիցին` Հըզպալլային աջակցելէ ետ պիտի չկանգնի եւ պիտի շարունակէ անոր աջակցութիւն տրամադրել», նշեց Շենքըր: