Արցախի մշակոյթի նախկին նախարար, Հայ առաքելական եկեղեցւոյ Արցախի թեմի թեմական խորհուրդի ատենապետ Լեռնիկ Յովհաննիսեան Ազրպէյճանի նախագահի օգնական Հիքմեթ Հաճիեւի կողմէ հայկական ձեռագիր մատեաններու նմուշներու ցուցադրութիւնը «ձեռնածութիւն» որակեց:
Հիքմեթ Հաճիեւ Գանձասարի մատենադարանի ցուցասրահին մէջ անցեալ շաբաթավերջին դիւանագէտներուն ցուցադրած էր, իբրեւ թէ, հին հայկական գիրքերը: Բանալով ձեռագիրներու նմուշները, ան դիւանագէտներուն ցոյց տուած էր այդ գիրքերուն դատարկ էջերը, իսկ ներկայ դիւանագէտները անոր արձագանգած էին ծիծաղով:
Մինչդեռ Լեռնիկ Յովհաննիսեան կը նշէ, որ Գանձասարի մատենադարանը, որ Հայաստանի Մատենադարանի մասնաճիւղն էր, իր տնօրինութեան տակ գտնուող արժէքաւոր գիրքերը, նաեւ տպագիր այլ արժէքաւոր գիրքեր ապահով վայր տեղափոխած էր տակաւին 2020-ի 44-օրեայ պատերազմի ընթացքին: Ցուցասրահին մէջ մնացած էին միայն նմուշները, իսկ մշակութային արժէքները դուրս բերուած էին:
«Հաճիեւի ցուցադրութիւնը հերթական ձեռնածութիւնն է: Ինչ կը վերաբերի անոնց վրայ ծիծաղող դիւանագէտներուն, ապա անոնք շատ լաւ կը հասկնային, շատ լաւ գիտէին, թէ ի՛նչ տեղի ունեցած է: Իրենք ուղղակի պէտք էր հաւատային` կը հաւատային: Նոյն Կրոնոն, միւս դիւանագէտները, այնտեղ կային նաեւ Մինսքի խմբակի համանախագահ երկիրներու դիւանագէտներ: Իրենք տեղեակ չէ՞ին այդ խնդիրի մասին, ի հարկէ շատ լաւ տեղեակ էին: Ուղղակի այսօր պէտք է այդ քաղաքականութիւնը վարել, կը վարեն», «Ազատութիւն» ձայնասփիւռի կայանին հետ զրոյցի ընթացքին ըսաւ Լեռնիկ Յովհաննիսեան: