ԿԱՐՕ Կ.
Շատ անգամներ նկատած ենք, որ մարզիչներ կամ մարզիկներ «փայլուն» կամ աղմկայարոյց հարցազրոյցներ կու տան կամ խօսք կը «հասցնեն» մրցակից խումբերու հասցէին: Ասիկա կրնայ դրական մթնոլորտ ստեղծել համակիրներուն մօտ, կամ ալ ժխտական մթնոլորտ ստեղծել այլ համակիրներու մօտ:
Օրինակ Ռէալ Մատրիտի մարզիչ Ժոզէ Մուրինիօ միշտ ալ իր վրայ կեդրոնացուցած է բոլորին ուշադրութիւնը իր ցայտուն յայտարարութիւններով, մինչ ուրիշներ կը նախընտրեն լուրջ մնալ եւ աշխատանքը դատշին վրայ կատարել:
Ֆութպոլիստներու պարագան ալ կայ. օրինակ` Զլաթան Իպրահիմովիչ ժամանակին աջ ձախ կը յարձակէր իր զրոյցներու ընթացքին` նոյնիսկ խմբակիցներու հասցէին կարծր խօսքեր ուղղելով:
Սակայն վերջերս նոր աստղ մը ֆութպոլի աշխարհին մէջ ամբողջովին հեռու կ՛ուզէ մնալ զրոյցներէ կամ ելոյթներէ եւ բոլոր հարցումներուն կը պատասխանէ դաշտին վրայ: Այս վերջին տարիներու նորաձեւութիւն դարձած ընկերային ցանցեր սիրող մարզիկները, որոնք միշտ խօսելիք կամ ըսելիք կ՛ունենան, բնաւ բան չեն ըսեր Մայքըլ Օլիսէի մասին: Ֆրանսացի Օլիսէ, որ Պայերն Միւնիխի հետ 2 տարեշրջաններէ ի վեր փայլուն ելոյթներ կ՛ունենայ, միշտ ալ կը խուսափի լուսարձակներէ եւ հարցազրոյցներէ:
Քանի մը օր առաջ Պայերն Միւնիխի մրցումէն ետք, լրագրող մը Օլիսէին հարցուցած էր, թէ ի՞նչ է իր կարծիքը «Չեմփիընզ լիկ»-ի նոր տարեշրջանին մասին… Ան պարզապէս ըսած է, թէ «կ՛ուզէինք յաղթանակով սկսիլ եւ կրցանք»: Մրցումին լաւագոյն մարզիկը ընտրուելէ ետք լրագրողը պատրաստ էր քանի մը վայրկեան զրուցել Օլիսէի հետ, որ կարճ-կտրուկ պատասխաններ տուաւ` յայտնելով, որ իր նշանակած երկու կոլերը պարզապէս մտան եւ այդքան ալ դժուար չէին: «Այդ հարուածները կրնային չմտնել նոյնիսկ… բայց մտան», ըսաւ ան: Լրագրողը կ՛ուզէր գիտնալ, թէ որքա՛ն դժուար էր այդպիսի կոլեր նշանակել… «միայն ես չեմ նշանակեր կոլեր, բոլորն ալ կրնան եւ կը նշանակեն»: Լրագրողը յայտնեց, որ Օլիսէ կը դժուարացնէ հարցազրոյցը, եւ ուզեց փակել հարցնելով, թէ ի՞նչն է, որ կ՛ուրախացնէ Օլիսէն… կոլ նշանակե՞լը, յաղթե՞լը, Օլիսէ փակեց 59 երկվայրկեան տեւած հարցազրոյցը «այո՛» ըսելով:
Այո՛, դաշտին մէջ կը խօսի Օլիսէ իր խաղով եւ իր տուած արդիւնքով: Յոյսով, որ Օլիսէ օրինակ դառնայ բոլոր մարզիկներուն եւ մարզիչներուն, որոնք աւելի կը խօսին, քան կ՛աշխատին:
Վստահաբար ամէն անձ նոյն անհատականութիւնը չունի, բայց ճիշդ աշխատանքը դաշտին վրայ պէտք է թարգմանուի: