Արժանթինցի յառաջապահ, 8 անգամ «Պալոն տ՛օր»-ի տիտղոսակիր Լիոնել Մեսսի համաձայնած է Սպանիոյ Բ. դասակարգին մաս կազմող Էլտենսէ ֆութպոլի ակումբը ձեռք բերելու շուրջ:
Ասիկա 39 տարեկան Մեսսիի երկրորդ ակումբն է, զորս ձեռք կը բերէ 2026-ին: Ինթեր Մայեմիի աստղի փաստաբանները արդէն որոշ ժամանակ բանակցութիւններ կը վարէին ակումբի ներկայ սեփականատիրոջ` Խուան Քարլոս Թրուխելիոյի գլխաւորած քոլոմպիական ներդրումային խումբին հետ: Կը սպասուի, որ Մեսսի գնէ ակումբի բաժնետոմսերուն 100 տոկոսը` հանդէս գալով իբրեւ միակ ներդրող, առանց երրորդ անձի կամ նախկին ֆութպոլիստներու առարկութեան:
Գործարքի պաշտօնական աւարտը կապուած է Սպանիոյ Մարզական բարձրագոյն խորհուրդին, որ ինք միայն կրնայ վճռել կացութեան լուծումը: Մեսսին կրնայ դառնալ առաջին արժանթինցին, որ արհեստավարժ ֆութպոլի ակումբի սեփականատէր կը դառնայ Սպանիոյ մէջ:
Ակումբի ընտրութիւնը պատահական չէ: Էլտենսէ կը գտնուի Ալիքանթէ նահանգի Էլտա քաղաքին մէջ, որ կը գտնուի Քաթալոնիոյ մօտ: Մեսսին կ՛ուզէ հոն հաստատուիլ` իր ասպարէզը աւարտելէ ետք: Էլտենսէ այժմ Սպանիոյ Բ. դասակարգին մաս կը կազմէ եւ կը գրաւէ ոչ շատ նախանձելի 20-րդ դիրքը:
Եթէ գործարքը յաջողութեամբ աւարտի, ասիկա պիտի ըլլայ 2026-ին Մեսսիի կողմէ ձեռք բերուած երկրորդ ակումբը: Ապրիլին ան արդէն դարձած էր քաթալոններու շրջանի Քոռնելիա ակումբի սեփականատէրը: Այս ակումբը կը գտնուի Սպանիոյ ֆութպոլի աւելի ցած դասակարգի մէջ, բայց ճանչցուած է իր հզօր ակադեմիայով, ուր ժամանակին մարզուած են Ժորտի Ալպայի, Տաւիտ Ռայայի եւ Քէյթա Պալտէի նման ֆութպոլիստներ: Այժմու եւ նախկին ֆութպոլիստներու կողմէ ակումբներ գնելու գաղափարը աւելի եւս կը տարածուի: Քրիսթիանօ Ռոնալտօ ունի սպանական Ալմերիա ակումբի բաժնետոմսերուն 25 տոկոսը, Լուքա Մոտրիչ եւ Զլաթան Իպրահիմովիչ փոքր բաժնետէրեր են յաջորդաբար Սուանսիի (Անգլիա) եւ Հեմըրպի (Շուէտ) ակումբներուն: Քիլիան Էմպափէ 2024-ին 15 միլիոն եւրոյով «գնեց» ֆրանսական Քան ակումբը, մինչ Ժերար Փիքէ 2018-ին ձեռք բերած էր ցած դասակարգի մաս կազմող Անտորրա ակումբը, որ կարճ ժամանակի ընթացքին հասաւ Բ. դասակարգ:
Նշենք, որ 39 տարեկան Մեսսի, որ Ինթեր Մայեմիի հետ 2025-ին դարձած է «Էմ. Էլ. Էս.»-ի ախոյեան եւ երկարաձգած իր պայմանագիրը ակումբին հետ մինչեւ 2028 թուական, վերջերս աւարտեց իր արհեստավարժ ասպարէզը Արժանթինի ազգային խումբին հետ, 2026-ի Մոնտիալի աւարտական հասնելէն ետք: Ան նաեւ ընդգրկուած է 2026-ի «Պալոն տ՛օր»-ի թեկնածուներու ցանկին մէջ: