Լիտվայի տարածքը կհայտնվի Ռուսաստանի միջուկային զենքի նշանառության տակ, եթե Վիլնյուսը որոշում կայացնի իր մոտ նման զենք տեղակայել։ Այս մասին «Առաջին ալիքին» ասել է ՌԴ նախագահի մամուլի քարտուղար Դմիտրի Պեսկովը։
Ինչպես նշել է Պեսկովը, երկրում տեղակայված միջուկային զենքն ուղղված է որևէ մեկի դեմ։ Ակնհայտ է, որ դեպի արևմուտք այդ զենքն ուղղված չի լինի, այն ուղղված կլինի դեպի արևելք, այսինքն՝ Ռուսաստանի դեմ, ընդգծել է մամուլի քարտուղարը։
«Եվ եթե տարածքում լինի միջուկային զենք, որն ուղղված է մեր դեմ, համապատասխանաբար այդ երկրի տարածքը նույնպես կհայտնվի մեր միջուկային զենքի նշանառության տակ»,- «Առաջին ալիքին» ասել է Պեսկովը։
Ինչպես հիշեցնում է ռուսական գործակալությունը, ավելի վաղ «LRT» հեռուստառադիոկազմակերպությունը՝ հղում անելով Լիտվայի խորհրդարանի նախագահ Յուոզաս Օլեկասին, հայտնել էր, որ հանրապետության կառավարությունը ծրագրում է 2027 թվականի սկզբին սահմանադրությունից հանել իր տարածքում զանգվածային ոչնչացման զենքի արգելքի մասին դրույթը։