Յունաստանն ու Եգիպտոսը Եգիպտոսի Ալամէյն քաղաքին մէջ Յունաստանի վարչապետ Քիրիաքոս Միցոթաքիսի եւ Եգիպտոսի նախագահ Ապտել Ֆաթթա Սիսիի միջեւ հանդիպումի ընթացքին իրենց յարաբերութեան ռազմավարական բնոյթը շեշտեցին: Այս մասին հաղորդեց յունական «Էքաթիմերինի»-ն:
Այդ հանդիպումին յաջորդեց Կիպրոսի նախագահ Նիքոս Խրիսթոտուլիտեսի մասնակցութեամբ եռակողմ հանդիպում մը:
«Էքաթիմերինի» կը գրէ, թէ քննարկումները տեղի ունեցած են շրջանային զարգացումներու, ներառեալ Մեքքայի համաձայնութեան խորապատկերին վրայ, եւ ներկայացուած են իբրեւ վերահաստատում, թէ յոյն-եգիպտական յարաբերութիւններու խորքը անփոփոխ կը մնայ:
Միցոթաքիս հանդիպման առիթը օգտագործած է Թուրքիոյ յղելու հետեւեալ պատգամը. «Յունաստանը ոչ ոքի կը սպառնայ եւ միջազգային օրէնքին վրայ հիմնուած գործնական յարաբերութիւններու ճամբով կայունութեան կը ձգտի»:
«Կայունութիւնը որեւէ պարագայի կատարուած իրողութիւններու առջեւ նահանջ կամ հանդուրժողութիւն չի նշանակեր: Ուստի, Յունաստան ո՛չ իր դիրքորոշումները վստահութեամբ պաշտպանելէ կը վախնայ, ո՛չ ալ երկխօսութեան դիմելէ», աւելցուցած է ան:
Յունաստանի վարչապետը Եգիպտոսի հետ յարաբերութիւնները ներկայացուցած է իբրեւ շրջանային գործակցութեան բնորդ` ուղղակի կերպով ակնարկելով երկու երկիրներուն միջեւ 2020 թուականի ծովային մասնակի սահմանագծման համաձայնութեան:
«Երբ քաղաքական կամք ու միջազգային օրինականութեան յանձնառութիւն գոյութիւն ունի, կրնանք հասնիլ փոխշահաւէտ մերձեցումներու` միաժամանակ ամրապնդելով շրջանին մէջ կայունութիւնը», ըսած է ան:
Եռակողմ միացեալ յայտարարութիւնը վերահաստատած է եռակողմ համագործակցութեան գործիքակազմին նկատմամբ աջակցութիւնը եւ նշած. «Սահմանազատման կամ ծովային իրաւասութեան վերաբերեալ համաձայնագիրները կամ փոխըմբռնման յուշագիրները պէտք է կնքուին միջազգային օրէնքին համապատասխան», ներառեալ Ծովային իրաւունքի մասին ՄԱԿ-ի հռչակագիրին եւ եռակողմ ծիրին մէջ համաձայնեցուած սկզբունքներուն:
Յայտարարութեան մէջ նաեւ աջակցութիւն յայտնուած է պաղեստինեան հարցի լուծման` ստեղծումովը 1967 թուականի սահմաններով պետութեան մը, որուն մայրաքաղաքը Արեւելեան Երուսաղէմն է, եւ Այսրյորդանանի եւ Կազայի միջեւ իրաւական շարունակականութեամբ:
Երեք երկիրները նաեւ կոչ ուղղած են` յարգելու Լիբանանի տարածքային ամբողջականութիւնը եւ համաձայնած Լիպիոյ մէջ ազգային միասնութեան անհրաժեշտութեան շուրջ` «առանց արտաքին միջամտութեան»:
Յայտարարութեան մէջ յղում կատարուած է ԿՐԵԿԻ նախագիծին եւ ընդգծուած Եգիպտոսի հասանելիութիւնը Նեղոսի ջուրերուն` միեւնոյն ժամանակ ընդգծելով Եգիպտոսի համապարփակ գործընկերութիւնը Եւրոպական Միութեան հետ:
«Էճիփթ Տէյլի Նիուզ» կը հաղորդէ, որ երեք երկիրներու ղեկավարները իրենց հանդիպումի ընթացքին կեդրոնացած են ուժանիւթային գործակցութեան խորացման, շրջանային անվտանգութեան ամրապնդման եւ Միջին Արեւելքի մէջ մագլցում արձանագրող հակամարտութիւններու լուծման վրայ:
Վեհաժողովի աւարտին հրապարակուած հաղորդագրութեան մէջ երեք ղեկավարները վերահաստատած են իրենց հաւատարմութիւնը նոյեմբեր 2014-ին Գահիրէի մէջ ստեղծուած գործիքակազմին` իբրեւ շրջանային համարկման յաջող բնորդ:
Անոնք համաձայնած են կեանքի կոչել այդ գործիքակազմի մշտական քարտուղարութիւնը, որ պիտի հիմնուի Կիպրոսի մայրաքաղաք Նիկոսիոյ մէջ:
Ինչ կը վերաբերի Լիբանանին, անոնք շեշտած են լիբանանեան պետութեան հաստատութիւնները, նախ եւ առաջ զինեալ ուժերը զօրացնելու կարեւորութիւնը: