Իրանի Ազգային անվտանգութեան խորհուրդի քարտուղար Մոհսեն Ռիտայի նշեց, որ Միացեալ Նահանգներ վերջին շրջանին իրանեան նոր հրթիռներու ճամբով յստակ զգուշացում մը ստացած են:
Ռիտայի աւելցուց, որ Իրան տնտեսական պատերազմին պիտի հակադարձէ հաստատելով ծովային արգիլեալ շրջան մը, որ Ծոցէն մինչեւ շրջափակման մերձակայք կ՛երկարի:
Ան նշեց, որ Իրան խորքային կերպով վերականգնեց պատերազմական նաւերու եւ ամերիկեան ռազմակայաններու նկատմամբ իր գործողութիւններու կացութիւնը:
Միացեալ Նահանգներու նախագահ Տանըլտ Թրամփ յայտնեց, թէ քարիւղի գիները սուր կերպով պիտի նուազին, երբ Միացեալ Նահանգներ Իրանի հետ պատերազմին յաղթանակ արձանագրեն:
Թրամփ աւելցուց, որ վառելանիւթի գինի տակառը 3 տոլարի պիտի նուազի, ապա նուազ քան երկու տոլարի պիտի նուազի` շեշտելով, որ ատիկա շատ արագ տեղի պիտի ունենայ:
Ան շեշտեց, թէ Իրան «երբեք հիւլէական զէնք պիտի չունենայ»:
Իրանի խորհրդարանի փոխնախագահ Ալի Նիքզատ յայտնեց. «Ցնորքներու մէջ գտնուող Միացեալ Նահանգներու հակառակորդ կառավարութեան մեր խորհուրդն է` աւելի չխայտառակուիլ եւ որքան կարելի է շուտ լքել Միջին Արեւելքի եւ Պարսից ծոցի շրջանը»:
Նիքզատ զգուշացուց, որ Իրան մինչեւ օրս ամերիկեան ռազմակայաններն ու պատերազմական նաւերը հարուածելու ընթացքին օգտագործած է իր կարելիութիւններուն միայն մէկ մասը:
«Այս պատերազմը կործանեց Միացեալ Նահանգներու կեղծ վեհութիւնը, եւ այսօր միջազգային ընտանիքի եւ ազատ ժողովուրդներու արթնցած խիղճը աւելի մեծ յստակութեամբ կը տեսնէ իրականութիւնը», աւելցուց ան:
Ռուսիոյ արտաքին գործոց նախարար Սերկէյ Լաւրով իր սէուտցի պաշտօնակից Ֆայսալ Պըն Ֆարհան իշխանին հետ միացեալ մամլոյ ասուլիսի ընթացքին անհրաժեշտ նկատեց գոյութիւն ունեցող տարակարծութիւնները քաղաքականութեան եւ դիւանագիտութեան ճամբով լուծել:
Լաւրով աւելցուց, որ Մոսկուան ու Ռիատը կոչ կ՛ուղղեն` Իրանի եւ Միացեալ Նահանգներու միջեւ գոյացած Իսլամապատի արձանագրութեան գործադրութեան համար միջին լուծումներ գտնել: