Նախադպրոցական կրթության համակարգում երեխաների ընդգրկումը և տարիքային խմբերի ձևավորումը կարգավորվում են ըստ երեխայի տարիքի։ Օրենքը նաև հստակեցնում է, թե որ ամսաթվով է որոշվում երեխայի՝ տվյալ տարիքային խմբին պատկանելը։
Ինչպես տեղեկացնում է Iravaban.net–ը, ՀՀ նախադպրոցական կրթության մասին օրենսգրքի 6-րդ հոդվածի համաձայն՝ Նախադպրոցական ուսումնական հաստատություն կամ համապատասխան նախադպրոցական ծառայություն կարող են ընդգրկվել այն երեխաները, որոնց նախադպրոցական տարիքը լրացել կամ լրանում է տվյալ օրացուցային տարվա դեկտեմբերի 31-ը ներառյալ։
Այսինքն՝ երեխայի տարիքային խումբը որոշելիս հաշվի է առնվում ոչ միայն նրա՝ տվյալ պահին լրացած տարիքը, այլև այն հանգամանքը, թե երեխան քանի տարեկան կդառնա մինչև տվյալ տարվա դեկտեմբերի 31-ը։
Մանկապարտեզում ի՞նչ տարիքային խմբեր կան
Օրենքը նախատեսում է երեխաների տարիքային վեց հիմնական խմբեր։
0-1 տարեկան՝ վաղ մանկության առաջին խումբ։
Այս խմբում ընդգրկվում են 0-ից մինչև 1 տարեկան երեխաները։
1-2 տարեկան՝ վաղ մանկության երկրորդ խումբ։
Այստեղ ընդգրկվում են 1-ից մինչև 2 տարեկան երեխաները։
2-3 տարեկան՝ կրտսեր առաջին խումբ։
3-4 տարեկան՝ կրտսեր երկրորդ խումբ։
4-5 տարեկան՝ միջին խումբ։
5-6 տարեկան՝ ավագ խումբ։
Այս տարիքային բաժանումը հնարավորություն է տալիս նախադպրոցական կրթական գործընթացը կազմակերպել երեխայի զարգացման տարիքային առանձնահատկություններին համապատասխան։
6 տարեկան դարձած երեխան դեռ մնում է ավագ խմբո՞ւմ
Այո, օրենքը հատուկ կարգավորում ունի այս դեպքի համար։
Եթե երեխան ավագ խմբում ընդգրկված լինելու ընթացքում դառնում է 6 տարեկան, նրա ուսուցումն ու զարգացումը կազմակերպվում են մինչև տվյալ տարվա օգոստոսի 20-ը։
Կարևոր է, որ այս դեպքում նշանակություն չունի՝ երեխան կոնկրետ երբ է լրացնում 6 տարեկանը․ նա կարող է շարունակել ավագ խմբում մինչև օգոստոսի 20-ը։
Կարո՞ղ են տարբեր տարիքի երեխաները սովորել նույն խմբում
Այո։ Օրենքը թույլ է տալիս ձևավորել նաև տարատարիք խմբեր։
Այսպիսի խմբերում կարող են ընդգրկվել տարբեր տարիքի երեխաներ, այդ թվում՝ տարբեր կրթական ծրագրեր յուրացնող երեխաներ։
Սակայն նման խմբերի ձևավորումը կատարվում է կրթության պետական կառավարման լիազորված մարմնի սահմանած կարգով։
Ծանուցում. սույն նյութի պատկերը գեներացվել է արհեստական բանականության գործիքակազմի օգնությամբ։