Հակառակ Փութինի յայտարարութեան, թէ Ուքրանիոյ մէջ խաղաղ կարգաւորման առիթներ կան, տակաւին նման ելքի որոշակի նախադրեալներ չեն ձեւաւորուած: ԹԱՍՍ լրատու գործակալութիւնը կը հաղորդէ, որ այս մասին ըսած է Ռուսիոյ նախագահի մամլոյ քարտուղար Տմիթրի Փեսքով:
«Ո՛չ, ատոր մասին խօսիլը տակաւին կանուխ է», ըսած է Փեսքով` պատասխանելով այն հարցումին, թէ արդեօք վերջին շրջանին յայտնուա՞ծ են խաղաղութեան նոր նախաձեռնութիւններ Արեւելեան տնտեսական համախմբումի նախագահի յայտարարութիւններէն ետք:
«Որոշակի նախադրեալներ, ցաւօք, տակաւին չկան: Աշխատանքը կը շարունակուի, եւ հաղորդակցութիւնները կը շարունակուին», ընդգծած է ան:
Փեսքով նշած է, որ նախկինին պէս գոյութիւն ունի բարի կամքը ամերիկացիներու, որոնք պատրաստ են շարունակելու միջնորդական ջանքերը, նախկինին պէս գոյութիւն ունի Ռուսիոյ պատրաստակամութիւնը` անցնելու կարգաւորման խաղաղ դրութեան եւ նպատակներուն հասնելու խաղաղ դրութեան, նախկինին պէս անսասան կը մնայ Ռուսիոյ այն դիրքորոշումը, զոր երկու տարի առաջ Փութինը հնչեցուցած էր արտաքին գործոց նախարարութեան մէջ:
«Ատիկա Քիեւի մէջ հիանալի գիտեն, եւ այդ բոլորը, անշուշտ, հիմք կու տայ ըսելու, որ նման հաւանականութիւն կայ, կարելի չէ բացառել, որ ի վերջոյ, կարելի պիտի ըլլայ դուրս գալ խաղաղ կարգաւորման դրութիւն», եզրափակած է ան: