Լիբանանեան պատասխանատու աղբիւր մը «Ժազիրա» արբանեակային պատկերասփիւռի կայանին յայտնեց, թէ իսրայէլեան ընտրութիւններուն իբրեւ հետեւանք ժամանակի վատնում ու բանակցային հոլովոյթը ուշացնելու փորձ գոյութիւն ունի` նշելով, որ ստուգման մեքանիզմի եւ անոր մասնակիցներու ճշդման ուշացում գոյութիւն ունի:
«Փորձնական շրջաններու ձախողութեան մասին իսրայէլեան խօսակցութիւնները ժամանակ շահելու համար ձգձգումի մարտավարութիւն են», ընդգծեց ան` աւելցնելով. «Մեր կողմէ բանակցութիւններու հոլովոյթը դադրեցնելը հեռաւոր կարելիութիւն է»:
«Փորձեցինք Ալի Թահեր բարձունքները մարտէն խնայել, սակայն մեր ջանքերը անյաջող էին», բացատրեց ան` աւելցնելով, որ Իսրայէլի զինուորական ցուցանիշերը կը վկայեն Ալի Թահերէն անդին անցնող զինուորական զարգացման մասին:
«Լիբանանեան բանակին կողմէ թերացում չկայ, սակայն ներքին ճակատի վրայ արիւնահեղութիւն չենք ուզեր», յայտնեց աղբիւրը` նշելով, որ Իսրայէլ հարաւային Լիբանանի մէջ միջազգային ուժ չ՛ուզեր եւ աշխատանք կը տանի լիբանանեան բանակին հետ ուղղակի հաղորդակցութիւն հաստատելու:
«Ամերիկեան երաշխիք ունինք, թէ Լիբանանը Ուաշինկթընի եւ Թեհրանի միջեւ բանակցային խաղաքարտ պիտի չըլլայ», նշեց լիբանանեան պատասխանատու աղբիւրը:
«Հըզպալլային խորհրդակցելու պատգամներ յղեցինք, սակայն անոր կողմէ ընդառաջում չեղաւ», ըսաւ ան` աւելցնելով. «Հըզպալլան կրնայ օգտակար տարր ըլլալ պետութեան կողմէ ղեկավարուող բանակցութիւններուն մէջ` իր սահմանուած սկզբունքներուն ծիրին մէջ, եւ կրնայ լուծման մաս կազմել, եթէ խնդիրը լուծող լիբանանեան լեզուով խօսի»:
«Աշխատանք կը տանինք զէնքի պատրուակը վերացնելու ուղղութեամբ, եւ կուսակցութեան մերժումը զայն լիբանանցի ժողովուրդին եւ իր համակիր զանգուածին առջեւ պատասխանատու կը դարձնէ», յայտնեց աղբիւրը` աւելցնելով, որ գոյութիւն ունի միջազգային համոզում մը, որ Հըզպալլան ո՛չ զէնքի ուժով, ո՛չ ալ արագ կարելի է զինաթափել: