Հայաստանի Ազգային ժողովի «Հայաստան» դաշինքը երեքշաբթի օր հրապարակեց հետեւեալ յայտարարութիւնը.
«Հայաստանի Հանրապետութեան երկրորդ նախագահ, «Հայաստան» դաշինքի առաջնորդ Ռոպերթ Քոչարեանի եւ նրա ընտանիքի անդամների նկատմամբ իրականացուող ապօրինի գործողութիւնները օրինականութիւնը կորցրած, սեփական իշխանութիւնը բացառապէս ապօրինութիւններով պահող վարչախմբի հերթական շնական դրսեւորումներն են:
«Սա իրաւական գործընթաց չէ. սա պետական կառոյցի բացայայտ ծառայեցումն է մէկ անձի քաղաքական վախերին ու վրէժխնդրութեանը: Խորհրդարանական ամպիոնից հնչող սպառնալիքներին անմիջապէս յաջորդող ուժային արշաւները փաստում են մէկ բան` իշխող վարչախումբը, ընդունելով արտաքին բոլոր պարտադրանքները, որդեգրել է ընդդիմութեանը մեկուսացնելու, դիմադրութեան բոլոր հնարաւոր օճախները ոչնչացնելու քաղաքականութիւն:
«Սեփական ընտրազանգուածի համար էժանագին տեսարաններ բեմադրելով` գործող իշխանութիւնը փորձում է նաեւ խորացնել հասարակութեան մէջ առկայ վախի մթնոլորտը:
««Հայաստան» դաշինքը յայտարարում է`
«- Շանթաժի, ապօրինի վարոյթների եւ շինծու հետապնդումների լեզուով մեզ հետ խօսելն ապարդիւն է:
«- Ո՛չ նախագահ Քոչարեանին, ո՛չ նրա ընտանիքին եւ ո՛չ էլ մեր քաղաքական խումբին հնարաւոր չէ ընկճել կամ պարտադրել հաշտուել ստեղծուած իրավիճակի հետ:
«Մենք շարունակելու ենք մեր պայքարը եւ գործադրելու ենք բոլոր ջանքերը` Հայաստանին պարտադրուող նոր զիջումները դիմագրաւելու համար:
«Որեւէ բռնապետութիւն յաւերժ չէ, եւ ապօրինութիւնների հեղինակներն ու կատարողները կանգնելու են պատասխանատուութեան առջեւ»: