Խորհրդարանի՝ օգոստոսի 26-ի նիստում քննարկվել է ԱԺ տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի ընտրության հարցը։ Այս մասին հաղորդում է ԱԺ մամուլի ծառայությունը։
«ԱԺ «Ուժեղ Հայաստան» խմբակցության ղեկավար Նարեկ Կարապետյանը հայտնել է, որ այդ պաշտոնում խմբակցությունն առաջադրել է պատգամավոր Իրինա Յոլյանի թեկնածությունը։
Խմբակցության պատգամավոր Անդրանիկ Գևորգյանը ներկայացրել է թեկնածուի կենսագրական տվյալներն ու գործունեությունը։
Ելույթ ունենալով՝ Իրինա Յոլյանը շնորհակալություն է հայտնել ԱԺ «Ուժեղ Հայաստան» խմբակցությանը՝ Տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի պաշտոնում իր թեկնածությունն առաջադրելու և վստահության համար։ Անդրադառնալով ՏԻՄ-երին՝ թեկնածուն համոզմունք է հայտնել, որ տեղական ինքնակառավարումը ոլորտ է, որն ուղղակիորեն, ամենօրյա կերպով առնչվում է մեր երկրի յուրաքանչյուր քաղաքացու կյանքին, համայնքների կենսունակությանն ու պետության ընդհանուր դիմակայունությանը։ «Այն պատասխանատվությունը, որ դրված է այս հանձնաժողովի առջև, պահանջում է ոչ միայն ընթացիկ, օրվա խնդիրների լուծում, այլև հեռահար տեսլականի սահմանում՝ հավասարակշռված մոտեցումներ և ամենակարևորը՝ համակարգային աշխատանք»,- շեշտել է նա՝ հաջորդիվ ներկայացնելով իր տեսլականը ոլորտի զարգացման վերաբերյալ։
Թեկնածուն պատասխանում է պատգամավորների հարցերին»,- նշվում է հաղորդագրության մեջ։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter