Պակիստանի բանակի հրամանատար Ասիմ Մունիրը երկուշաբթի օրը մեկնել է Թեհրան՝ Իրանի և Միացյալ Նահանգների միջև բանակցությունները վերսկսելու փորձով։ Այցելությունից առաջ նա զրուցել է ԱՄՆ նախագահ Դոնալդ Թրամփի հետ, հաղորդում է EFE-ն։
«Այն բանից հետո, երբ Պակիստանը ստանձնեց միջնորդի դերը, ֆելդմարշալ Մունիրը մշտական կապ է պահպանել ԱՄՆ ղեկավարության հետ։ Նույնիսկ Թեհրանում գտնվելու ընթացքում նա կապ է պահպանում ամերիկացի պաշտոնյաների հետ», – գործակալությանը հայտնել է Պակիստանի հետախուզության բարձրաստիճան պաշտոնյան, որը ցանկացել է անանուն մնալ։
Նա ասել է, որ Պակիստանը ցանկանում է այս հակամարտության խաղաղ ավարտ և ջանքեր է գործադրում բանակցությունների միջոցով խաղաղության հասնելու համար։
Մունիրը երկուշաբթի օրը ժամանել է Թեհրան, որտեղ նախատեսված են նրա հանդիպումները Իրանի բարձրաստիճան պաշտոնյաների հետ։