Իրանի Իսլամական հեղափոխության պահապանների կորպուսի (ԻՀՊԿ) հետ կապված հաքերները կիբերհարձակման միջոցով չորս օրով խափանել են Մեծ Բրիտանիայի էլեկտրակայաններից մեկի աշխատանքը։ Ինչպես հայտնում է The Telegraph պարբերականը, սա առաջին դեպքն է, երբ իրանցի հաքերներին հաջողվել է կանգնեցնել նմանատիպ էներգետիկ օբյեկտի աշխատանքը։
Թեև համակարգերի վերականգնման համար աշխատակիցներից պահանջվել է չորս օր, միջադեպը չի ազդել երկրի էներգահամակարգի ընդհանուր կայունության վրա և չի հանգեցրել հոսանքազրկումների։
Մեծ Բրիտանիայի կիբերանվտանգության ազգային կենտրոնը և պաշտոնական անձինք հրաժարվել են հայտնել տուժած էլեկտրակայանի անունը՝ անվտանգության նկատառումներից ելնելով։ Բրիտանական հատուկ ծառայությունների գնահատմամբ՝ հաքերների նպատակը ոչ թե բնակչությանը վնաս հասցնելն էր, այլ սեփական կարողությունների ցուցադրումը։
Կիբերհարձակումից անմիջապես հետո Մեծ Բրիտանիայի կառավարությունն արտակարգ փակ քննարկումներ է անցկացրել երկրի էներգետիկ ընկերությունների ղեկավարների հետ և հրահանգել խստացնել պաշտպանական միջոցառումները: