Պերուում օգոստոսի 20-ին տեղի ունեցած 7,2 մագնիտուդ ուժգնությամբ երկրաշարժի հետևանքով առնվազն երեք մարդ տուժել է։ Այս մասին հայտնել է Քաղաքացիական պաշտպանության ազգային ինստիտուտը։
«Առողջապահության նախարարության օպերատիվ շտաբը այս պահին հայտնում է երեք տուժածի մասին, որոնց բուժօգնություն է ցուցաբերվել Կորակորայի հիվանդանոցում»,– ասվում է հաղորդագրության մեջ։
RPP ռադիոկայանի տվյալներով՝ վնասվել է ավելի քան 20 շինություն։
Պերուի երկրաֆիզիկայի ինստիտուտի տվյալներով՝ 7,2 մագնիտուդ ուժգնությամբ երկրաշարժը տեղի է ունեցել հինգշաբթի՝ երկրի հարավային կենտրոնական հատվածում գտնվող Այակուչո դեպարտամենտի Կորակորա քաղաքից 35 կմ հյուսիս։ Երկրաշարժի օջախը գտնվել է 108 կմ խորության վրա։