Ֆուտբոլի Հայաստանի հավաքականի և Կազանի «Ռուբինի» կիսապաշտպան Ուգոչուկվու Իվուն 9 ամիս տևած վերականգնումից հետո վերադարձել է խաղադաշտ: Այս մասին սոցցանցերում հայտարարություն է տարածել ՀՖՖ-ն:
26-ամյա ֆուտբոլիստը վնասվածք էր ստացել 2025 թ. նոյեմբերի 8-ին՝ Ռուսաստանի առաջնության 15-րդ տուրի «Պարի Նիժնի Նովգորոդի» դեմ խաղում, որից հետո վիրահատվել էր:
Վերականգնումից հետո Հայաստանի հավաքականի կիսապաշտպանն օգոստոսի 15-ին առաջին հանդիպումն է անցկացրել «Ռուբինի» կազմում և մասնակցել ամբողջ հանդիպմանը:
«Վիրահատություն, երկար վերականգնում և վերջապես վերադարձ։
280 օր անց՝ օգոստոսի 15-ին, Իվուն վնասվածքից հետո անցկացրեց առաջին պաշտոնական հանդիպումը «Ռուբինի» մեկնարկային կազմում՝ խաղալով 90 րոպե։
Բարի վերադարձ, Իվո՛ւ»,- գրված է ՀՖՖ հայտարարության մեջ։
Ուգոչուկվու Իվուն «Ռուբինում» հանդես է գալիս 2023 թ-ից։ Նախորդ մրցաշրջանում նա անցկացրել է 19 հանդիպում, կատարել 3 գոլային փոխանցում։