Սպանիոյ պաշտպանութեան նախարար Մարկարիթա Ռուպլես յայտնեց, որ հիւսիսային Ափրիկէի մէջ Սապթա եւ Մալիլա քաղաքներուն վրայ Սպանիոյ գերիշխանութիւնը «քննարկումի նիւթ չէ»: Ան այդպիսով պատասխանեց Մարոքի արդարադատութեան նախարար Ապտելլաթիֆ Ուեհպիի յայտարարութեան, որուն մէջ ան երկու քաղաքներուն վրայ Ռապաթի գերիշխանութեան հաստատման պահանջը կը կրկնէր:
Սպանացի նախարարը Սապթա այցելութեան ընթացքին նշեց, որ երկու քաղաքները «բացառապէս սպանական են, եւ անոնց կարելի չէ ձեռք տալ»` աւելցնելով. «Սապթայի եւ Մալիլայի վրայ որեւէ յարձակում ամբողջ Սպանիոյ վրայ յարձակումի նման է:
Սպանիոյ արտաքին գործոց նախարարութիւնը իր կարգին յայտնեց, որ երկրին հողային ամբողջականութիւնը «որեւէ կողմի հետ չքննարկուեցաւ եւ երբեք պիտի չքննարկուի»:
Նշենք, որ Մարոք 1956 թուականին անկախանելէն ի վեր Սապթայի եւ Մալիլայի վրայ իր գերիշխանութեան տարածումը կը պահանջէ` զանոնք նկատելով Սպանիոյ կողմէ բռնագրաւուած շրջաններ, իսկ Սպանիան կը շեշտէ, թէ երկու քաղաքները իր հողերուն անբաժանելի մասն են: