Իրաքի վարչապետ Ալի Զէյտի յայտնեց, որ Միջազգային դաշինքի Իրաքի մէջ առաքելութեան 30 սեպտեմբերին աւարտը «վերջնական եւ անդառնալի ժամկէտ է»` շեշտելով բարձրագոյն մակարդակի ապահովական ծրագիրներու գործադրութիւնը, ներքին կայունութեան աջակցութիւնն ու ազգային գերիշխանութեան երաշխաւորումը:
Իրաքի վարչապետի տեղեկատուական գրասենեակը հաղորդագրութիւն մը հրապարակելով նշեց, որ ան այս մասին յայտնած է ազգային անվտանգութեան նախարարաց խորհուրդի ժողովի ընթացքին, որ յատկացուած է ներքին եւ շրջանային թղթածրարներու քննարկման:
Ժողովը քննարկած է շրջանային կացութեան ընթացքն ու զարգացումները` ընդգծելով իրաքեան գերագոյն շահերու պաշտպանութեան քայլերու որդեգրման եւ հանդարտեցման ու կայունութեան հիմքերը ամրապնդելու կարեւորութիւնը:
Զէյտի ընդգծած է Իրաքի մէջ օրէնքի իշխանութեան ամրապնդման, ապահովական ու զինուորական հաստատութիւններու զարգացման եւ տնտեսական ու ընկերային կայունութեան ամրապնդման կարեւորութիւնը, ինչ որ կ՛երաշխաւորէ պետութեան վարկի պահպանումը եւ քաղաքացիի պետական հաստատութիւններուն նկատմամբ վստահութեան ամրապնդումը: