Ռուսիոյ նախագահ Վլատիմիր Փութին յայտարարեց. «Ռուսիան նոյնպիսի քայլով պիտի հակադարձէ, եթէ արեւմտեան երկիրներ ռուսական առեւտրական նաւեր գրաւեն»:
Փութին Խաղաղական ովկիանոսի մէջ ռուսական նաւատորմիղի ռազմափորձին հետեւելու ընթացքին իր արտասանած խօսքին մէջ յայտնեց. «Խաղաղական ովկիանոսի նաւատորմիղը անհրաժեշտ է մարտունակութիւնը պահպանելու եւ Ռուսիոյ անվտանգութիւնը երաշխաւորելու համար»` շեշտելով. «ՕԹԱՆ-ը Խաղաղական ովկիանոսի շրջան կը ներթափանցէ, եւ հակամարտութեան յառաջացման հաւանականութիւնը կը բարձրանայ»:
«Ճափոն առաջին անգամ ըլլալով Ռուսիան ներառեց իր դիմագրաւած գլխաւոր սպառնալիքներու ցուցակին վրայ: Ռուսիա Ճափոնին սպառնալիք չի ներկայացներ, եւ Մոսկուա Թոքիոյի նկատմամբ որեւէ պնդում չունի», ըսաւ ան:
«Ռուսիա իր պատրաստակամութիւնը կը յայտնէ Հիւսիսային բեւեռի շրջանին, ներառեալ հիւսիսային ծովային ուղիին մէջ գործակցելու», յայտարարեց Ռուսիոյ նախագահը: