ԱՄՆ-ի ոստիկանությունը հրապարակել է այն սպառնալիքների մանրամասները, որոնց իրենք և Հետախուզությունների դաշնային բյուրոն (ՀԴԲ) բախվել են աշխարհի 2026 թվականի ֆուտբոլի առաջնության ընթացքում։
Աղբյուրի տեղեկություններով՝ ստացված սպառնալիքների քանակով «ռեկորդակիրը» եղել է Արգենտինայի ազգային հավաքականի հարձակվող Լիոնել Մեսսին։ Արգենտինա – Հորդանան (3-1) խմբային փուլի հանդիպումից առաջ մի տղամարդ զանգահարել է Դալասի օդանավակայան և «սպառնացել գրոհել մարզադաշտը ևս երկու անձի հետ, որոնք զինված են ինքնաշեն ռումբերով և հրացաններով։ Նա հատուկ շեշտել է Մեսսիի անունը և նշել, որ նրան սպանելու նպատակ ունեն։
Մեսսիի հասցեին սպառնալիքները կրկնվել են նաև 1/8 եզրափակչի՝ Եգիպտոսի դեմ խաղից (3-2) առաջ։
«Ես պատրաստվում եմ ներխուժել Ատլանտայի մարզադաշտ և պայթեցնել Մեսսիին իմ մարմնին ամրացված չորս ռումբով»,- սոցիալական ցանցերում գրել է մի տղամարդ։
Նաև ահազանգ է ստացվել, որ մարզադաշտի աղբամաններում երեք ռումբ է թաքցված, սակայն շների ներգրավմամբ իրականացված խուզարկությունը ցույց է տվել, որ ահազանգը կեղծ էր։
Սպառնալիքները չեն շրջանցել նաև Պորտուգալիայի ազգային հավաքականի առաջատար Կրիշտիանու Ռոնալդուին։ Հյուրանոցում, որտեղ հանգրվանել էր Պորտուգալիայի ընտրանին, նկատվել է «կասկածելի մի տղամարդ», որը մանրամասն տեղեկություններ է պահանջել Ռոնալդուի գտնվելու վայրի մասին։ Երկու օր անց այդ տղամարդը Հյուսթոնի ոստիկանության կողմից ձերբակալվել է նույն հյուրանոցում։ Նմանատիպ դեպք է գրանցվել նաև Տորոնտոյում. մի տղամարդ փորձել է մտնել այն վերելակը, որում այդ պահին գտնվել է պորտուգալացին։
Անվտանգության հետ կապված լուրջ խնդիրներ են ունեցել նաև մրցավարները։ Արգենտինա — Եգիպտոս հանդիպման գլխավոր մրցավար, ֆրանսիացի Ֆրանսուա Լետեքսիեն մեսենջերներից մեկում ավելի քան 6000 սպառնալիք է ստացել։ Նմանատիպ իրավիճակում է հայտնվել նաև այդ խաղի VAR-ի մրցավար Վիլի Դելաժոն։ Իրավիճակից ելնելով՝ Ֆրանսիայում խստացրել են նրանց տների և ընտանիքների անվտանգության պահպանման միջոցառումները։