Ազգային ժողովի իշխող «Քաղաքացիական պայմանագիր» խմբակցության ղեկավար Արուսյակ Մանավազյանը «Ազատության» հետ զրույցում հայտնեց, որ դեռ չունեն որոշում՝ կընտրե՞ն ԱԺ փոխնախագահի պաշտոնում ընդդիմադիր «Ուժեղ Հայաստան» խմբակցության թեկնածու Արամ Վարդևանյանին, թե ոչ:
«Խմբակցությունը դեռ քննարկում չի ունեցել, առաջիկա ժամերի ընթացքում կունենանք: Որոշում որպես այդպիսին, դեռ չունենք», – ասաց Մանավազյանը:
Ազգային ժողովն այսօր սկսել է քննարկել ԱԺ փոխնախագահի պաշտոնում ընդդիմադիր «Ուժեղ Հայաստան» խմբակցության թեկնածու Արամ Վարդևանյանի ընտրության հարցը։
Առանց ՔՊ-ի քվեարկության Արամ Վարդևանյանի ընտրությունը փաստացի հնարավոր չէ, քանի որ խորհրդարանական մեծամասնությունը պատկանում է իշխող խմբակցությանը:
Խորհրդարանն արդեն ընտրել է երկու փոխնախագահների․ իշխող «Քաղաքացիական պայմանագրից» այդ պաշտոններում ընտրվել են Հայկ Կոնջորյանն ու Վահագն Ալեքսանյանը։
ԱԺ նախագահի երեք տեղակալներից մեկի, ինչպես նաև մշտական հանձնաժողովներից չորսի նախագահների պաշտոնները օրենքով հատկացված են ընդդիմությանը: