Իսրայէլեան աղբիւրներ «Ժազիրա» արբանեակային պատկերասփիւռի կայանին յայտնեցին, որ առնուազն երկու իսրայէլացի զինուորներ սպաննուած են հարաւային Լիբանանի Մաժտալ Զուն շրջանին մէջ ականի մը պայթումին պատճառով:
Իսրայէլեան բանակը յայտարարեց. «Հըզպալլան զինադադարը խախտեց, եւ բանակը անոր դէմ ուժեղ կերպով պիտի գործէ», աւելի ուշ աւելցնելով. «Հարաւային Լիբանանի մէջ թիրախաւորուած հարուածներու սկսանք` հակադարձելով Հըզպալլայի կողմէ զինադադարի խախտման»:
Իսրայէլեան հրետանին ռմբակոծեց Սուր գաւառի Զըպքին եւ Մաժտալ Զուն գիւղերուն միջեւ գտնուող շրջանը:
Իսրայէլեան բանակի բանբեր Էլլա Ուաուիէ Մանսուրի գիւղին մէջ գտնուող բնակիչները զգուշացուց, որ պէտք է անմիջապէս իրենց տուները լքեն եւ գիւղէն առնուազն 1000 մեթր դէպի հիւսիս բաց տարածք տեղափոխուին:
Իսրայէլեան օդուժը յարձակում գործեց Պընթ Ժպէյլ գաւառի Թըպնին գիւղին վրայ: Առողջապահութեան նախարարութիւնը յայտարարեց, թէ յարձակումին պատճառով արձանագրուած է զոհ մը եւ 12 ուրիշներ վիրաւորուած են: