Խորհրդարանի նախագահ Նեպիհ Պըրրի մեկնաբանեց իսրայէլեան բանակին կատարած ականահարումները, որոնք երէկ թիրախ դարձուցին Շքիֆի ամրոցի մերձակայքը, Առնուն, Քֆարթպնիթ, Եըհմոր Շքիֆ եւ Հատասա գիւղերը, իսկ ատկէ առաջ հարաւային շարք մը գիւղերը, գիւղաքաղաքներն ու քաղաքները:
«Հարաւային Լիբանանի, Լեռնալիբանանի եւ մայրաքաղաք Պէյրութի սահմանակից շրջաններու զաւակները զգացին 700 թոն պայթուցիկ նիւթերուն յառաջացուցած ահաբեկչական պայթումներուն ցնցումները, որոնք 3,8 աստիճան երկրաշարժի համազօր էին:
Անոնք ցնցումներ են, որոնք եթէ իսրայէլեան քանդումի մեքենային մարդուն, ժառանգութեան, մշակոյթին եւ քաղաքաշինութեան նկատմամբ կատարածին վերաբերեալ ազգային ու մարդկային գիտակցութիւնը չսթափեցնեն, մարդն ու անոր ապագան վտանգուած են», ըսաւ ան:
«Այն, ինչ որ տեղի ունեցաւ, դատապարտելի է, եւ կարելի չէ անոր նկատմամբ լուռ մնալ կամ անոր իրողութեան անձնատուր ըլլալ», շեշտեց Պըրրի: