Ուկրաինայի գլխավոր դատախազությունը նախագահ Վոլոդիմիր Զելենսկու գրասենյակից ստացել է դիմում՝ ուսումնասիրելու Բելառուսի նախագահ Ալեքսանդր Լուկաշենկոյի դեմ քրեական հետաքննություն սկսելու հնարավորությունը, «Ուկրինֆորմ»-ին հայտնել է գլխավոր դատախազի մամուլի խոսնակ Մարյանա Գաևսկա-Կովբասյուկը։ Նրա խոսքով՝ դիմումն այժմ ուսումնասիրվում է, սակայն մինչ օրս դրա հիման վրա քրեական վարույթ չի հարուցվել։
Հարցումը ներկայացվել է բելառուսական ընդդիմության «Ժողովրդավարական ուժերի ֆորումի» դիմումից հետո։ Ընդդիմադիրները պնդում են, որ Լուկաշենկոն աջակցել է Ռուսաստանի ռազմական գործողություններին Ուկրաինայի դեմ և պահանջում են այդ գործողություններին իրավական գնահատական տալ։
Reuters-ի գնահատմամբ՝ ներկայումս Լուկաշենկոյի նկատմամբ Ուկրաինայի դատարանում դատավարության իրական հեռանկար գրեթե չկա։ Սակայն հնարավոր քրեական գործը կարող է ծառայել որպես լրացուցիչ քաղաքական և իրավական փաստարկ՝ Բելառուսի նկատմամբ միջազգային ճնշումն ուժեղացնելու համար։