Լիբանանի գլխավոր դատախազ Ահմեդ Ռամի ալ-Հաջը հրամայել է հետախուզել լիբանանցի բանկիր Անտուան Սահնավիին՝ Իսրայելի հետ համագործակցելու և Իսրայելի բոյկոտի մասին օրենքը խախտելու կասկածանքով, հաղորդում է Լիբանանի ազգային լրատվական գործակալությունը (NNA):
1955 թվականին Լիբանանն ընդունեց «Իսրայելի բոյկոտի մասին» օրենքը, որն արգելում է ֆիզիկական և իրավաբանական անձանց՝ ուղղակիորեն կամ միջնորդների միջոցով, կնքել համաձայնագրեր կամ իրականացնել որևէ առևտրային, ֆինանսական կամ այլ գործարք Իսրայելի քաղաքացիների, ընկերությունների և հաստատությունների հետ: Օրենքի խախտման համար սպառնում է մինչև տասը տարի ազատազրկում:
«Վճռաբեկ դատարանի գլխավոր դատախազ, դատավոր Ահմեդ Ռամի ալ-Հաջը հրամայել է Անտուան Սահնավիին 30-օրյա հետախուզման մեջ ընդգրկել՝ իսրայելցի հակառակորդի հետ համագործակցելու և Իսրայելի բոյկոտի մասին օրենքը խախտելու մեղադրանքով», – հաղորդել է գործակալությունը։
Դատախազի հայտարարության համաձայն՝ Տեխնիկական տեղեկատվության բյուրոյի կողմից անցկացված վերլուծությունը հաստատել է, որ սոցիալական ցանցերում շրջանառվող լուսանկարը, որտեղ Սահնավին պատկերված է նույն սեղանի շուրջ Իսրայելի վարչապետ Բենիամին Նեթանյահուի հետ, իսկական է և թվային խմբագրման կամ արհեստական բանականության միջոցով փոփոխության չի ենթարկվել։
Ավելի վաղ լիբանանցի 20 փաստաբաններից բաղկացած խումբը բողոք էր ներկայացրել գլխավոր դատախազի գրասենյակ՝ պահանջելով հետաքննություն սկսել Սահնավիի և Նեթանյահուի՝ Վաշինգտոնում կայացած հանդիպման վերաբերյալ։ Բանկիրը մեղադրվում էր Իսրայելի հետ համագործակցության, դավաճանության և պետական անվտանգության դեմ ուղղված հանցագործություններ կատարելու մեջ։