Միացեալ Նահանգներու նախագահ Տանըլտ Թրամփ ֆրանսական «Էլ.Սէ.Ի.» պատկերասփիւռի կայանին յայտնեց. «Իրանի դէմ լայնածաւալ պատերազմը պիտի շարունակենք, եթէ մեր ուզածը 100 առ հարիւր չստանանք»:
Երկու աղբիւրներ «Աքսիոս» պատկերասփիւռի կայանին յայտնեցին, որ ամերիկեան բանակը ձեռնարկած է Իրանի դէմ լայնածաւալ գործողութիւններու շղթայազերծման հաւանականութեան ծրագիրներ պատրաստել, «սակայն Միացեալ Նահանգներու նախագահ Տանըլտ Թրամփ տակաւին իր հրամանը չէ տուած»:
«Թրամփ ուրբաթ օր կանաչ լոյս չտուաւ, երբ ամէնօրեայ կերպով յարձակումներու ծրագիրներուն հաւանութիւն կու տար», աւելցուցած է աղբիւր մը:
Աղբիւրներ ամերիկեան կայքին յայտնած են. «Բանակցութիւններուն մէջ յառաջընթացի արձանագրումը եւ շաբաթավերջի ընթացքին Իրանի ու Օմանի միջեւ համաձայնութեան գոյացման հաւանականութիւնը գոյութիւն ունի»` աւելցնելով. «Թրամփի հարուածները դադրեցնելու որոշումը Հորմուզի նեղուցին շուրջ բանակցութիւններ կատարելու համար օմանեան պատուիրակութեան մը Թեհրան հասնելէն ժամեր ետք տեղի ունեցած է»:
Աղբիւրներ ամերիկեան «Սի.Պի.Էս.Նիուզ» պատկերասփիւռի կայանին յայտնած են, որ Հորմուզի նեղուցին վերաբերեալ Օմանի եւ Իրանի բանակցութիւններուն մէջ յառաջընթաց կ՛արձանագրուի:
Իրանի արտաքին գործոց նախարարութեան բանբեր Իսմայիլ Պաղայի կիրակի օր յայտարարեց. «Օմանի հետ Հորմուզի նեղուցին շուրջ բանակցութիւնները արդիւնաւէտ էին, եւ երկու կողմերուն միջեւ թեքնիք ու քաղաքական խորհրդակցութիւնները կը շարունակուին»:
Իսրայէլի պետական պատկերասփիւռի կայանը շաբաթ օր հաղորդեց. «Իսրայէլ Իրանի վրայ ամերիկեան լայնածաւալ յարձակումի մը պատրաստուեցաւ, սակայն յարձակումը յետաձգուեցաւ»: Իսրայէլացի պաշտօնատար մը պատկերասփիւռի կայանին նշած է. «Միացեալ Նահանգներու նախագահ Տանըլտ Թրամփ որոշեց բանակցութիւններուն յաւելեալ առիթ ընծայել»:
Իսրայէլեան լրատուամիջոցներ, սակայն, կիրակի օր յայտնեցին. «Թրամփ մօտ օրէն Իրանի դէմ մագլցում պիտի չկատարէ, որովհետեւ իրանցիները Ծոցի մէջ պաշտպանութեան համակարգը նկատառելի կերպով քանդեցին»:
«Նիւ Եորք Թայմզ» օրաթերթը իր կարգին հաղորդեց. «Թրամփ որոշեց Իրանի դէմ պատերազմը չընդլայնել` «Փաթրիոթ» հրթիռներու եւ օդային պաշտպանութեան զինամթերքի նուազումին նկատմամբ մտավախութեան պատճառով»:
ՄԱԿ-ի մէջ Միացեալ Նահանգներու դեսպան Մայք Ուալց «Ֆոքս Նիուզ»-ին յայտնեց, որ Միացեալ Նահանգներու նախագահը Իրանի հետ բանակցութիւններուն «սահմանափակ առիթ» կ՛ընծայէ:
Իրանեան բարձրաստիճան աղբիւր մը «Ռոյթըրզ»-ին յայտնեց. «Յարձակումները պիտի դադրեցնենք, եթէ Ուաշինկթըն շարունակէ հարուածները դադրեցնել»:
Իրանեան աղբիւրը նշեց, որ Թրամփի Իրանի վրայ յարձակումը դադրեցնելէն ետք «լաւատեսութենէն աւելի կասկածներ գոյութիւն ունին»:
Աղբիւր մը «Արապիա»-ին յայտնած է. «Իրան փաքիստանցի պաշտօնատարներու յայտնեց, որ բանակցութիւններէն չէ հեռացած, այլ` զանոնք առկախած է»: