Իսրայելի Աշդոդ քաղաքի լողափում հայտնաբերվել է շուրջ 2500 տարվա հնության հազվագյուտ կիպրական մետաղադրամ։ Այդ մասին հայտնել է Իսրայելի Հնությունների վարչությունը՝ նշելով, որ երկրի տարածքում առաջին անգամ է հայտնաբերվում այդպիսի ամբողջական մետաղադրամ։
Մետաղադրամը հատվել է Կիպրոսի արևելյան ափին գտնվող հնագույն Սալամին քաղաքում՝ մ.թ.ա. V դարի կեսերին, երբ կղզին գտնվում էր Պարսկական կայսրության իշխանության տակ։ Այն հայտնի է որպես «սիգլոս», կշռում է մոտ 11 գրամ։ Մի կողմում պատկերված է պառկած խոյ, մյուս կողմում՝ խոյի գլուխ՝ քառակուսի խորացված շրջանակի մեջ։ Դրա կողքին ուղղահայաց պատկերված է դափնու ճյուղ, իսկ ներքևում՝ երեք խորհրդանիշ, որոնք, ենթադրաբար, կիպրական վանկային գրի նշաններ են։
Իսրայելի Հնությունների վարչության դրամագիտական բաժնի պատասխանատու Յաննիվ Դավիդ Լևիի խոսքով՝ առաջին հայացքից մետաղադրամը արծաթից էր թվում, սակայն մանրակրկիտ ուսումնասիրությունը ցույց է տվել, որ այն պատրաստված է արծաթապատ մետաղից։ Նրա խոսքով՝ դա բնորոշ երևույթ է այդ ժամանակաշրջանի կիպրական դրամների համար և պայմանավորված է եղել կղզում արծաթի պակասով։
Լևին նաև նշել է, որ պարսկական ժամանակաշրջանի նման չափի և արժեքի ամբողջական մետաղադրամները հնագիտական գտածոների մեջ շատ հազվադեպ են, քանի որ սովորաբար դրանք ժամանակի ընթացքում կտրատվել են փոքր մասերի՝ որպես տեղական առևտրային արժույթ օգտագործելու համար։ Այդ պատճառով Աշդոդի ափամերձ գոտում ամբողջական մետաղադրամի հայտնաբերումը բացառիկ երևույթ է և ունի առանձնահատուկ պատմական նշանակություն։