Անապայում անասնաբույժներն ու կամավորները փրկել են մոտ 1500 թռչուն, որոնք տուժել են լցանավերի վթարից և նավթամթերքի արտահոսքից։ Թռչունների մեծ մասն արդեն ուղարկվել է վերականգնման: Այս մասին հայտնել է Կուբանի օպերատիվ շտաբը։
«Ներկայումս Անապայում փրկվել է 1471 թռչուն, որոնցից 1241-ը ուղարկվել է վերականգնման։ Թռչուններին ընդունում են Ստավրոպոլի երկրամասի «Պելիկան» կենտրոնը, Կրասնոդարի «Սաֆարի-պարկը» և Տեմրյուկի շրջանի «Լուկոմորիե» կենդանաբանական այգին», — ասված է հաղորդագրությունում։
Կուբանի բնապահպանության նախարարությունը հիշեցնում է, որ անհրաժեշտ է բռնել միայն իրականում ուժասպառ թռչուններին, որոնք ափին են և չեն կարողանում դիմադրել։ Իշխանությունների խոսքով՝ հաճախակիացել են թռչուններին վնաս պատճառելու դեպքերը, երբ նրանց բռնում են գիշերվա ընթացքում։ Նշվում է, որ լապտերների օգտագործումն ու դիմադրող թռչուններին բռնելը նրանց ավելի շատ վնաս է պատճառում, քան օգուտ։