2025 թվականի հունվարի 1-ին լրանում է 2014 թվականի մայիսի 29-ին Եվրասիական տնտեսական միության (ԵԱՏՄ) մասին պայմանագրի ուժի մեջ մտնելուց և ԵԱՏՄ-ի՝ որպես տարածաշրջանային ինտեգրացիոն ասոցիացիայի փաստացի գործունեության մեկնարկի 10 տարին։
Ռուսաստանի արտաքին գործերի նախարարությունը ԵԱՏՄ 10-ամյակի կապակցությամբ հայտարարություն է տարածել, որում ասվում է.
«Իր գոյության տարիների ընթացքում Միությունը և նրա անդամ երկրները՝ Ռուսաստանը, Հայաստանը, Ղազախստանը, Ղրղզստանը և Բելառուսը, կարողացել են զգալի արդյունքների հասնել։
Ներքին շուկան գործում և բարելավվում է, միջազգային շփումների աշխարհագրությունը ընդլայնվում է, իսկ հինգ երկրների միջև փոխադարձ առևտուրը կայուն աճ է գրանցում։ ԵԱՏՄ երկրները խորացնում և ամրապնդում են փոխշահավետ համագործակցությունը տարբեր ոլորտներում՝ մաքսային, մաքսային-սակագնային, ոչ սակագնային և տեխնիկական կարգավորում, արդյունաբերական համագործակցություն, տրանսպորտ և լոգիստիկա, էներգետիկա և գյուղատնտեսություն։
Իր գործունեության 10 տարիների ընթացքում Միությունը դարձել է միջազգային տնտեսական հարաբերությունների կարևոր դերակատար։ Այս մասին են վկայում ԵԱՏՄ միջազգային շփումների ցանցը, որը ներառում է ազատ առևտրի համաձայնագրեր Վիետնամի, Իրանի և Սերբիայի հետ, երկու ոչ արտոնյալ համաձայնագրեր Չինաստանի հետ և համագործակցության ավելի քան 80 հուշագրեր։
Աշխատանքներ են տարվում Եգիպտոսի, Ինդոնեզիայի և ԱՄԷ-ի հետ առևտրի ազատականացման համաձայնագրերի համաձայնեցման ուղղությամբ։ Դիտորդ երկրների՝ Կուբայի և Ուզբեկստանի հետ ակտիվ փոխգործակցությունը նույնպես կարևոր դեր է խաղում»: