Միացեալ Նահանգներու նախագահ Տանըլտ Թրամփ Սպիտակ տան մէջ ժողովուրդին ուղղուած ճառի մը մէջ յայտնեց. «Միացեալ Նահանգները այժմ աշխարհի տարածքին լաւագոյն պետութիւնն են»:
«Միացեալ Նահանգները ներկայիս աւելի ներդրումներ ունին, քան երբեւէ», ըսաւ ան` աւելցնելով. «Միացեալ Նահանգներու մէջ սղաճը վեց տարիներու ընթացքին մեծագոյն անկումը արձանագրեց, եւ մեր ելեւմտական շուկաները իրենց բացարձակապէս բարձրագոյն մակարդակին վրայ են»:
«Որեւէ պետութիւն չի կրնար մեծ ըլլալ, եթէ անոր ընտրութիւնները պարկեշտ չեն», նշեց Սպիտակ տան ղեկավարը` յայտարարելով. «Տարիներով ամերիկեան ընտրութիւններուն մէջ միջամտութիւններու վերաբերեալ հետախուզական տեղեկութիւնները թաքնուեցան, սակայն ես զանոնք պիտի գաղտնազերծեմ»:
«Չինաստանը 2020-ի ընտրութիւններուն ընթացքին շուրջ 20 միլիոն ամերիկացիներու սեփական տեղեկութիւններուն ծանօթացաւ: Կը ջանանք ստեղծել ընտրական ապահով համակարգ մը, որ խարդախութիւնն ու ընտրութիւններուն միջամտութիւնը գործնականին մէջ անկարելի կը դարձնէ»:
«Այս գիշեր անմիջապէս գաղտնազերծումն ու հրապարակումը պիտի յայտարարեմ վճռական հետախուզական տեղեկութիւններու, որոնք մեր ընտրութիւններու ենթակառոյցին մէջ ցնցիչ խոցելի կէտեր կը բացայայտեն», ըսաւ ան` աւելցնելով. «Տրամադրութեան տակ գտնուող փաստերը կ՛ապացուցեն, թէ մեր ընտրական համակարգը աննախադէպ վտանգաւոր մակարդակով արտաքին ներթափանցման եւ միջամտութեան ենթարկուած է»:
«Փաստաթուղթերը ապացուցեցին, որ Չինաստանը կատարած է ընտրութիւններու տուեալներու ներթափանցման եւ գողնալու մեծագոյն գործողութիւնը, որ սկսած է 2020 թուականին: Չինաստանի կողմէ քուէարկողներու տուեալներու գողութիւնը Միացեալ Նահանգներու մէջ ընտրութիւններու անվտանգութեան աննախադէպ մղձաւանջ մը կը ներկայացնէ», յայտնեց Միացեալ Նահանգներու նախագահը:
«Փեքին յատուկ միաւոր մը ստեղծեց` ամերիկացի քուէարկողներու համացանցահէնութեան ենթարկուած տուեալները շահագործելու եւ զանոնք խափանարարական գործողութիւններու մէջ օգտագործելու համար: Մեր փաստաթուղթերը հետախուզական գործակալութիւններու մէջ խորքային պետութենէն տարրերու չինական միջամտութեան մեղսակցութիւնն ու զայն թաքցնելը կը բացայայտեն»:
«Կը պահանջենք ջնջել նամակատան ճամբով քուէարկութիւնը եւ զայն սահմանափակել միայն հիւանդութեան, հաշմանդամութեան, զինուորական ծառայութեան կամ ճամբորդութեան պարագային», նշեց ան:
Չինաստանի արտաքին գործոց նախարարութեան բանբեր Լի Ցիան` անդրադառնալով Թրամփի` Չինաստանի ամերիկեան ընտրութիւններուն միջամտելու մասին պնդումին նշեց, «Ամերիկեան կողմի նման յայտարարութիւնները զուտ յօրինուածք են եւ չարամիտ զրպարտութիւն»:
«Չինական կողմը միշտ հաւատարիմ մնացած է այլ պետութիւններու ներքին գործերուն չմիջամտելու սկզբունքին, ատոր նկատմամբ հետաքրքրութիւն չէ ցուցաբերած եւ երբեք չէ միջամտած Միացեալ Նահանգներու ընտրութիւններուն», յայտնած է ան: