Հաւատարմութիւն դիմադրութեան երեսփոխանական պլոքի անդամ Հիւսէյն Ժաշի յայտնեց. «Իսրայէլացի թշնամիի լիբանանեան պետութեան հետ ուղղակի բանակցութիւններուն համաձայն գտնուելուն նպատակը շրջանցելն էր փոխըմբռնման յուշագիրը (Միացեալ Նահանգներ-Իրան, «Ա.»), որ Լիբանանի մէջ զինադադար եւ բռնագրաւումի հեռացում կը նշէ: Իսլամական հանրապետութիւնը աշխատանք կը տանէր այս հոլովոյթին աջակցելու, ինչ որ լիբանանեան շահերուն կը ծառայէ»:
Երեսփոխանը քննադատեց հանրապետութեան նախագահն ու վարչապետը` նշելով, որ անոնք «բռնագրաւումի հեռացման հասնելու համար այդ յուշագիրին վրայ հիմնուելու փոխարէն` Լիբանանի տարածքին մէջ իսրայէլացի թշնամիի ներկայութիւնը կապեցին Դիմադրութեան զէնքին` «շրջագծային համաձայնագիր»-ին միջոցով, հաշուի առնելով, որ համաձայնագիր կը ներառէ Լիբանանի իշխանութիւններուն եւ իսրայէլացի թշնամիին միջեւ համագործակցութիւն` Դիմադրութեան եւ անոր ժողովուրդի դիմակայման գործին մէջ»:
Ան ըսաւ, որ շրջագծային համաձայնութիւնը նախարարաց խորհուրդին չներկայացուեցաւ եւ հասարակական կարծիքին չներկայացուեցաւ` հարց տալով, թէ ի՞նչ է ատոր պատճառը, եթէ իրապէս ի շահ Լիբանանի է, հանրապետութեան նախագահին ու վարչապետին կոչ ուղղելով յստակացնելու, թէ ինչի՛ շուրջ համաձայնութիւն գոյացած է:
«Իշխանութիւնը զիջեցաւ լիբանանեան գերիշխանութիւնն ու իրաւունքները», ըսաւ ան եւ վկայակոչելով բռնագրաւումի ժամանակի կրճատման շուրջ վարչապետի յայտարարութիւնները, հարց տուաւ, թէ բանակցութիւններն ու դիւանագիտութիւնը անցնող փուլին ի՞նչ իրագործեցին:
Ժաշի նշեց, որ բանակցութիւններն ու դիւանագիտութիւնը չեն կրցած լիբանանեան հողերէն որեւէ մաս ազատագրել կամ զինադադար պարտադրել: