Ֆինլանդիայի իշխանությունները Հելսինկիի տակ կառուցել են 5500 ռմբապաստարաններից բաղկացած ստորգետնյա քաղաք, որը հագեցած է լողավազաններով, սաունաներով, եկեղեցիներով և այլ հարմարություններով: Այս մասին հաղորդում է բրիտանական The Times թերթը՝ հղում անելով տեղական իշխանություններին:
«Սա կրկնակի օգտագործման գաղափար է։ Այս կառույցները քաղաքի կողմից կառուցվում են արտակարգ իրավիճակների համար, բայց հետո վարձակալության են տրվում։ Լավ է, որ դրանք օգտագործվում են. այդպիսով մենք գիտենք, որ ամեն ինչ աշխատում է, բայց մեզ համար նաև շատ կարևոր է, որ երեխաներն այստեղ խաղան, որպեսզի ճգնաժամի դեպքում նրանք արդեն ծանոթ լինեն տեղին», – թերթը մեջբերել է Հելսինկիի բնակիչների անվտանգության վարչության ներկայացուցիչ Յուկա-Պեկա Շրյոդերուսի խոսքերը։
Նրա խոսքով՝ Ֆինլանդիայի իշխանությունները կառուցում են ռմբապաստարաններ՝ միջուկային ապոկալիպսիսի կամ երկրի վրա զինված հարձակման դեպքում։ Ռմբապաստարանների համակարգը պաշտպանված է պողպատե դռներով, որոնք կարող են դիմակայել պայթյունի ալիքներին և կանխել քիմիական, կենսաբանական և միջուկային սպառնալիքները։
Բունկերները կարող են միաժամանակ տեղավորել մոտ մեկ միլիոն մարդու, չնայած Հելսինկիի բնակչությունը կազմում է մոտ 689,000 մարդ։
Նշվում է, որ քաղաքում կառուցվող ցանկացած գրասենյակային կամ բնակելի շենք պետք է ունենա ստորգետնյա ապաստարան: Բունկերների ցանցը համազգային քաղաքացիական պաշտպանության համակարգի մի մասն է, որի միջոցով բնակիչները պարբերաբար անցնում են դասընթացներ, այդ թվում՝ դաշտային խոհարարության, անօդաչու թռչող սարքերի օգտագործման և ինքնապաշտպանության վերաբերյալ: