ԱՄՆ ներկայացուցիչները չեն մասնակցում շաբաթ օրը Օմանում տեղի ունեցող Իրանի վերաբերյալ խորհրդակցություններին։ CBS News-ի թղթակից Ջենիֆեր Ջեյքոբսը այս մասին հայտնել է X-ում՝ հղում անելով ԱՄՆ վարչակազմի պաշտոնյային։
Ըստ իր հրապարակման՝ ո՛չ ԱՄՆ փոխնախագահ Ջ.Դ. Վենսը, ո՛չ պետքարտուղար Մարկո Ռուբիոն, ո՛չ ԱՄՆ նախագահի հատուկ բանագնաց Սթիվ Ուիտկոֆը, ո՛չ էլ ԱՄՆ նախագահի փեսան՝ Ջարեդ Քուշները, չեն մասնակցել Օմանում կայացած խորհրդակցություններին։ «ԱՄՆ տեխնիկական թիմ նույնպես չկա», – նշել է նա՝ բացատրելով, որ «ամերիկացիները բանակցությունների ընթացքում հեռակա կապ կպահպանեն Օմանի և Կատարի ներկայացուցիչների հետ»։
Ուրբաթ օրը CBS-ը հայտնել է, որ ԱՄՆ նախագահ Դոնալդ Թրամփը հանձնարարել է Վենսին, Ռուբիոյին և մյուս ներկայացուցիչներին շարունակել բանակցությունները Իրանի հետ։ Ամերիկացի առաջնորդի խոսքով՝ ԱՄՆ-ն, Իրանի խնդրանքով, համաձայնել է շարունակել բանակցությունները հակամարտության կարգավորման համար, սակայն հրադադարն ավարտվել է։
Իրանի արտաքին գործերի նախարարությունը շաբաթ օրը հայտարարել է, որ Օման կատարած այցի ընթացքում արտգործնախարար Աբբաս Արաղչին հանդիպել է իր օմանցի գործընկեր Բադր բին Համադ բին Համուդ ալ-Բուսաիդիի հետ՝ Հորմուզի նեղուցում անվտանգության մեխանիզմները քննարկելու համար։ Հանդիպումից հետո տարածված հայտարարության մեջ նշվում էր, որ ուշադրություն է դարձվել «Հորմուզի նեղուցով նավերի անվտանգ անցումն ապահովելու համար համապատասխան մեխանիզմների» ստեղծմանը՝ համաձայն ԱՄՆ-Իրան հուշագրի 5-րդ հոդվածի։
Չորեքշաբթի գիշերը ԱՄՆ զինված ուժերը մի շարք հզոր հարվածներ են հասցրել Իրանին։ ԱՄՆ կենտրոնական հրամանատարությունը հայտարարել է, որ սա Հորմուզի նեղուցով անցնող առևտրային նավերի դեմ Իրանի գործողությունների պատասխանն է։ Իրանի զինված ուժերը հայտնել են Բահրեյնում և Քուվեյթում գտնվող ամերիկյան բազաների վրա պատասխան հարվածների մասին։ Իրանի իշխանությունները մեղադրել են Վաշինգտոնին ռազմական գործողությունների դադարեցման մասին հուշագիրը խախտելու մեջ։