Թուրքիայի արտաքին գործերի նախարար Հաքան Ֆիդանը կանխատեսել է, որ Իրանը և Միացյալ Նահանգները կկարողանան լուծել Հորմուզի նեղուցի շուրջ իրենց տարաձայնությունները մինչև այս շաբաթվա վերջը։
«Հորմուզի նեղուցի բացումը ամենակարևոր պայմաններից մեկն էր, և կողմերը գործեցին համապատասխանաբար, սակայն գործնականում գործընթացի տարբեր ընկալումներով։ Մի կողմը տեսավ, որ ինչ-որ բան տեղի է ունենում իր իմացության բացակայության պայմաններում՝ նավերի վրա հարձակումներ, լարվածության սրում և նեղուցի շրջափակում։ Նեղուցով անցման կարգավորումը պետք է հիմնված լինի ընդհանուր ըմբռնման վրա։ Երեկվանից, դիվանագիտական ջանքերից հետո, կողմերի միջև լռության շրջան է սկսվել։ Եվ հիմա մենք պետք է լուծենք խնդիրը՝ վերականգնելով փոխըմբռնումը։ Ես կարծում եմ, որ նեղուցով անցման վերաբերյալ անհամաձայնության լուծումը կարող է գտնվել մինչև շաբաթավերջ», – ասել է Ֆիդանը TRT-ի եթերում։
Նա նաև նշել է, որ նեղուցով անցման հարցը ազդում է մի քանի կողմերի շահերի վրա։ «Մի կողմում Իրանն է, մյուս կողմում՝ Օմանը։ Իրանն ունի իր իրավունքները միջազգային ջրերում՝ 12 մղոնանոց գոտում։ Օմանն էլ նույնն ունի։ Իսկ նրանց միջև կա մոտ 20 մղոնանոց մեկ այլ հատված։ Այս գոտիների օգտագործման հարցը պետք է լուծվի», – բացատրել է նա։
Հուլիսի 8-ի գիշերը ԱՄՆ-ն վերսկսեց լայնածավալ հարվածներ Իրանի դեմ՝ մեղադրելով նրան Հորմուզի նեղուցի վերաբերյալ ձեռք բերված համաձայնագրերի պայմանները խախտելու մեջ։ Ի պատասխան՝ Թեհրանը հարձակվեց տարածաշրջանում գտնվող ամերիկյան ռազմական օբյեկտների վրա։