Գերմանիոյ արտաքին գործոց նախարար Եոհան Վատեֆուլ Լիբանանի իշխանութիւններուն կոչ ուղղեց Հըզպալլայի դէմ դնելու եւ երկրի հարաւին վրայ պետութեան վերահսկողութիւնը վերականգնելու:
Վատեֆուլ, որ նախապէս զօրակցած էր Իսրայէլի հարաւային Լիբանան ներխուժման, բարձր գնահատեց Իսրայէլի եւ Լիբանանի միջեւ ամերիկեան միջնորդութեամբ գոյացած փոխըմբռնման յուշագիրը:
Գերմանական դիւանագիտութեան պետը Երուսաղէմի մէջ իր իսրայէլացի պաշտօնակից Կիտէոն Սահերի հետ միացեալ մամլոյ ասուլիսի ընթացքին շեշտեց. «Լիբանան պէտք է վճռակամութիւն ունենայ իր իշխանութիւնը տարածելու եւ երաշխաւորելու, որ Հըզապալլան հարաւային Լիբանանի վրայ որեւէ վերահսկողութիւն չունենայ»:
Վատեֆուլ շեշտեց, որ Լիբանան պէտք է «մասնաւորաբար երաշխաւորէ, որ Իսրայէլ լիբանանեան հողերէն որեւէ վտանգի չենթարկուի»:
Գերմանիոյ արտաքին գործոց նախարարը ողջունեց յառաջիկայ շաբաթ Հռոմի մէջ նախատեսուած ամերիկեան միջնորդութեամբ Իսրայէլ-Լիբանան բանակցութիւններու շարունակութիւնը, եւ խոստացաւ այդ երկխօսութեան եւրոպական ու գերմանական աջակցութիւն ապահովել:
Ան Լիբանանի եւ Իսրայէլի միջեւ ներկայիս ընթացող բանակցութիւնները որակեց «պատմական քայլ մը, որուն կարեւորութիւնը թերագնահատուեցաւ»: