Ավելի քան մեկ դար անց այն բանից հետո, երբ իսպանացի ճարտարապետ Անտոնիո Գաուդիը նախագծել էր իր ամենաֆանտաստիկ, բայց չիրականացված աշխատանքներից մեկը՝ «Hotel Attraction» երկնաքերը, նախագիծը նոր կյանք է ստացել՝ այս անգամ՝ արհեստական բանականության միջոցով ստեղծված պատկերներում։ Գաուդին, ով նաև նախագծել է Բարսելոնայի հայտնի Սագրադա Ֆամիլիան, երբեք չի տեսել իր Նյու Յորքի երկնաքերի իրականացումը։ Սակայն այժմ արվեստագետ, լուսանկարիչ և գրաֆիկ դիզայներ Թիերի Լեշանթյորի AI-պատկերները ցույց են տալիս, թե ինչպես կարող էր այն բարձրանալ Մանհեթենի երկնքում՝ որպես յուրօրինակ Արտ Նուվո ոճի կառույց։
Լեշանթյորը այս նախագիծը նկարագրել է որպես պատմության ամենամեծ ճարտարապետական «ինչ կլիներ, եթե…» հարցերից մեկը։ Գաուդիի մահվան 100-ամյակին ընդառաջ և Սագրադա Ֆամիլիայի շինարարական առաջընթացի ֆոնին, նրա չիրականացված նախագծերի նկատմամբ հետաքրքրությունը կրկին աճել է։ Հիշեցնենք, որ Սագրադա Ֆամիլիայի կառուցումը սկսվել էր դեռ 1882 թվականին, իսկ Գաուդին այն ղեկավարել էր 1883-ից՝ վերածելով այն «ապագայի եկեղեցու» գաղափարի։
AI-ի կիրառմամբ ստեղծված այս նոր պատկերները նաև ընդգծում են ժամանակակից ճարտարապետության մեջ արհեստական բանականության աճող ազդեցությունը։ Վերջին ուսումնասիրությունների համաձայն՝ ճարտարապետների մեծ մասը AI-ն օգտագործում է հիմնականում տեխնիկական և հետազոտական աշխատանքների համար, սակայն մտահոգություններ կան ճշգրտության և տվյալների վստահելիության վերաբերյալ։