Խորհրդարանի նախագահ Նեպիհ Պըրրի «Տիար» օրաթերթի հետ հարցազրոյցի ընթացքին յայտնեց, որ շրջագծային համաձայնութեան ստորագրումէն ետք ստեղծուած ճգնաժամէն ելքի հասնելու կարելիութիւն գոյութիւն ունի, եւ փոխզիջումնային լուծումի դուռը տակաւին բաց է` շեշտելով, որ ինք պատրաստ է ելք գտնելու, եթէ միւս կողմը եւս պատրաստ է` ընդգծելով. «Ոչ ոք կ՛ուզէ, որ երկիրը անելի մատնուի»:
Անդրադառնալով փոխզիջումնային լուծումի ձեւին` Պըրրի վերահաստատեց Իսրայէլի հետ ուղղակի բանակցութիւններուն իր ընդդիմութիւնը` նշելով, որ ինք գիտէր, թէ անոնք ո՛ւր պիտի հասցնեն, եւ յանգած են համաձայնութեան, որ ինք սադրանք որակած է, որ վատ է եւ Լիբանանի նկատմամբ անարդար:
Ան նշեց, որ 27 նոյեմբեր 2024-ին իր հովանաւորած համաձայնութիւնը այլ էր, որովհետեւ յանգեցաւ Լիթանիի հարաւէն Հըզպալլայի ամբողջական հեռացման` առանց ուղղակի բանակցութեան դիմելու:
Պըրրի ըսաւ, որ հանրապետութեան նախագահ Ժոզեֆ Աունի հետ կապ հաստատուած է, եւ կոչ ուղղուած` Իսրայէլի գաւառներու հիմամբ եւ ոչ թէ փորձառական շրջաններու հիմամբ հեռացումի սկզբունքը որդեգրելու: Պաապտայի պալատը ընդունած է առաջարկը, սակայն հետագային իրենք անակնկալի մատնուած են տեսնելով, որ փորձառական շրջաններու սկզբունքը որդեգրուած է:
Խորհրդարանի նախագահը յայտնեց, որ Հըզպալլայի իսրայէլեան ամբողջական հեռացման դիմաց Լիթանիի հարաւէն հեռացման պատրաստակամութիւն գոյութիւն ունի, իսկ Լիթանիէն հիւսիս զէնքի գոյութեան վերաբերեալ դիրքորոշումը հիմնուած է զայն լիբանանեան պետութեան շրջագիծին մէջ զսպման վրայ, եւ ոչ միայն Լիթանիէն հիւսիս, այլ ամբողջ Լիբանանի մէջ, ուր պետութիւնը պիտի ըլլայ միակ հեղինակութիւնը:
«Իսրայէլ իր ճնշումներուն ու պահանջներուն ճամբով աշխատանք կը տանի լիբանանեան բանակը Դիմադրութեան հետ բախումի մղելու», ըսաւ Պըրրի` աւելցնելով. «Ատիկա տեղի պիտի չունենայ, որովհետեւ լիբանանցիները կը գիտակցին ներքին սադրանքի մէջ ներքաշուելու վտանգին, եւ որովհետեւ բանակն ու Դիմադրութիւնը իսրայէլեան նպատակներուն պիտի չծառայեն»:
Ան շեշտեց, որ առաջնահերթութիւն կը մնան ներքին կայունութեան պաշտպանութիւնը եւ քաղաքական տարակարծութեան փողոց տեղափոխուիլը չարտօնելը` նկատի ունենալով, որ ատիկա քաղաքացիական խաղաղութեան պաշտպանութեան առաջին գիծն է:
Պատասխանելով այն հարցումին, թէ հանրապետութեան նախագահին պատգամ մը ունի՞, ան բաւարարուեցաւ ըսելով, որ ներկայիս որեւէ պատգամ չունի յղելիք:
Ինչ կը վերաբերի տագնապէն դուրս գալու կարելիութիւններուն, Պըրրի վերահաստատեց իր կարծիքը, թէ Լիբանան կարիքը ունի միջազգային ծածկոյթի, որ կարգաւորման կ՛օգնէ` նշելով, որ այդ ծածկոյթին պէտք է միանան Միացեալ Նահանգները, Սէուտական Արաբիան եւ Իրանը, որովհետեւ, իր կարծիքով, ատիկա կենսունակ որեւէ կարգաւորման հիմնական երաշխիք է:
Անդրադառնալով արաբական ու միջազգային, մասնաւորաբար եգիպտական ու քաթարեան ներկայ հաղորդակցութիւններուն, Պըրրի ողջունեց բոլոր նախաձեռնութիւնները, որոնք Լիբանանին իր ճգնաժամը յաղթահարել օգնելու համար են` շեշտելով, որ լիբանանցիները միաւորելու եւ պառակտման ուրուականը հեռացնելու նպատակը հետապնդող արաբական կամ միջազգային որեւէ ջանք ողջունելի է: