Իրաքի իշխանությունները առաջարկել են վերականգնել Իրանի, Իրաքի և Պարսից ծոցի արաբական պետությունների միջև հանդիպումների ձևաչափը և հայտնել են իրենց պատրաստակամությունը Բաղդադում նման հանդիպում անցկացնելու համար։ Այս մասին հայտարարել է Իրաքի արտգործնախարար Ֆուադ Հուսեյնը՝ իր իրանցի գործընկեր Աբբաս Արաղչիի հետ հանդիպումից հետո։
«Բանակցությունների ընթացքում մենք առաջարկել ենք վերադառնալ Պարսից ծոցի երկրների, Իրաքի և Իրանի միջև հանդիպումներին», – ասել է Իրաքի արտգործնախարարը, ինչպես մեջբերել է « Al Hadath» հեռուստաընկերությունը։ Հուսեյնը ընդգծել է, որ Բաղդադը «պատրաստ է հյուրընկալել նման հանդիպում»։
Հուսեյնը նշել է, որ Իրաքը «գերազանց հարաբերություններ ունի Միացյալ Նահանգների հետ», և, հետևաբար, Բաղդադը «հայտնում է իր պատրաստակամությունը օգնելու և՛ Թեհրանին, և՛ Վաշինգտոնին՝ վերջ դնելու նրանց միջև պատերազմական վիճակին»։