Օրենքը սահմանում է Հայաստանի Հանրապետության տարածքում գործող բանկերի, երկրի տարածքում գործող օտարերկրյա բանկերի մասնաճյուղերի վերակառուցման կարգն ու պայմանները: Ներդրվում է բանկերի վերակառուցման ինստիտուտը, իսկ բանկերին վերակառուցելու բացառիկ իրավասությունը վերապահվում է Կենտրոնական բանկին:
Վերակառուցում իրականացնելու համար Կենտրոնական բանկին օրենքով տրվում են իրավասություններ, որոնք հնարավորություն կտան հասնել վերակառուցման նպատակներին:
Ազգային ժողովը հունիսի 18-ին շարունակել է հերթական նիստերի աշխատանքը՝ առաջին ընթերցմամբ քննարկելով «Բանկերի վերակառուցման մասին» օրենքի նախագիծը՝ կից օրենսդրական փաթեթով: Օրենսդրական փաթեթը ներկայացրել է ԿԲ նախագահի տեղակալ Արմեն Նուրբեկյանը:
Զեկուցողը տեղեկացրել է, որ գործող կարգավորումներով, եթե որեւէ ֆինանսական ինստիտուտ կանգնում է ֆինանսական խնդրի առաջ, ապա այդ պարագայում միակ լուծումը, որը հնարավոր է կայունացման գնալու համար, այդ ֆինանսական ինստիտուտի լուծարումն է: Այս համատեքստում նշվել է, որ «Բանկերի վերակառուցման մասին» օրենքի նախագիծը նպատակ ունի փոխել այդ կարգավորումները՝ վերակառուցելով ճգնաժամային խնդրի առաջ կանգնած ֆինանսական ինստիտուտը:
Օրենքների նախագծերի փաթեթի ընդունման անհրաժեշտությունը բխում է դեռեւս 2018 թվականին Համաշխարհային բանկի եւ Արժույթի միջազգային հիմնադրամի կողմից Ֆինանսական համակարգի գնահատման ծրագրի (FSAP) շրջանակում ներկայացված առաջարկներից: Դրանց նպատակն է նախատեսել բավարար գործիքակազմ՝ ֆինանսական համակարգում անվճարունակ բանկերի ֆինանսական վիճակի վերականգնման եւ համակարգի կայունության ապահովման համար:
Նախագծի ընդունման արդյունքում կներդրվեն ճգնաժամերի կառավարման արդյունավետ եւ միջազգային չափանիշներին համահունչ մեխանիզմներ ու գործիքներ՝ ֆինանսական համակարգի կայունությունն ապահովելու համար:
Նշվել է, որ օրենսդրության բարելավումն անհրաժեշտ է ճգնաժամերի կառավարման արդյունավետ մեխանիզմներ ներդնելու, բանկերի ձախողման դեպքում բանկերի կրիտիկական գործունեության անընդհատությունը եւ ֆինանսական համակարգի կայունությունն ապահովելու համար:
Կներդրվի լայն գործիքակազմ՝ իրականացնելու բանկերի վերակառուցումն այնպես, որպեսզի ապահովվի նաեւ պետական միջոցների պաշտպանությունը՝ հնարավորինս նվազեցնելով պետական արտակարգ աջակցություն ստանալու անհրաժեշտությունը:
Արմեն Նուրբեկյանը պատասխանել է պատգամավորների հարցերին:
ԱԺ ֆինանսավարկային եւ բյուջետային հարցերի մշտական հանձնաժողովի դրական եզրակացությունը նախաձեռնության վերաբերյալ ներկայացրել է հանձնաժողովի նախագահ Ծովինար Վարդանյանը: