Հայաստանի Հանրապետության Սահմանադրական դատարանը որոշում է կայացրել կասեցնել «Երևան քաղաքի առաջին ատյանի ընդհանուր իրավասության քրեական դատարանի դիմումի հիման վրա՝ ՀՀ քրեական դատավարության օրենսգրքի 6-րդ հոդվածի 1-ին մասի 41-րդ կետի և 12-րդ հոդվածի 1-ին մասի 7-րդ կետի՝ Սահմանադրությանը համապատասխանության հարցը որոշելու վերաբերյալ» գործի վարույթը։ Iravaban.net-ը տեղեկանում է ՍԴ-ից։
Գործը Սահմանադրական դատարան էր ներկայացվել Երևանի առաջին ատյանի ընդհանուր իրավասության քրեական դատարանի կողմից և ՍԴ-ի 2026 թվականի ապրիլի 3-ի աշխատակարգային որոշմամբ ընդունվել էր քննության։ Գործով զեկուցող էր նշանակվել Սահմանադրական դատարանի դատավոր Դավիթ Խաչատուրյանը։
Դատաքննությունը սկզբնապես նշանակվել էր 2026 թվականի մայիսի 12-ին, սակայն հետագայում մի քանի անգամ հետաձգվել էր։ Նախ՝ մայիսի 6-ի աշխատակարգային որոշմամբ դատաքննությունը տեղափոխվել էր հունիսի 9, իսկ այնուհետև հունիսի 9-ի որոշմամբ՝ հուլիսի 7։
Սակայն Սահմանադրական դատարանը հետագա քննության ընթացքում արձանագրել է, որ անհրաժեշտություն է առաջացել ձեռք բերել լրացուցիչ ապացույցներ և տեղեկություններ վիճարկվող իրավադրույթների կիրառման պրակտիկայի վերաբերյալ։ Այդ նպատակով դատարանը նախատեսում է համապատասխան տվյալներ պահանջել իրավակիրառ մարմիններից, մասնավորապես՝ Հայաստանի Հանրապետության դատախազությունից և քննչական մարմիններից։
Սահմանադրական դատարանը նշել է, որ նման հանգամանքներում առկա է «Սահմանադրական դատարանի մասին» սահմանադրական օրենքի 56-րդ հոդվածի 1-ին մասի 3-րդ կետով նախատեսված հիմքը, որը հնարավորություն է տալիս կասեցնել գործի վարույթը մինչև անհրաժեշտ ապացույցների ձեռքբերումը և կասեցման հիմքի վերացումը։
Որոշմամբ սահմանվել է, որ գործի վարույթը կասեցվում է մինչև լրացուցիչ տվյալների ստացումն ու կասեցման պատճառների վերացումը։ Միաժամանակ ուժը կորցրած է ճանաչվել Սահմանադրական դատարանի 2026 թվականի հունիսի 9-ի ՍԴԱՈ-96 աշխատակարգային որոշումը՝ այն մասով, որով նշանակվել էր գործի դատաքննության օրը և ժամը։
Այսպիսով, վիճարկվող դրույթների սահմանադրականության հարցի վերաբերյալ վերջնական քննությունը կշարունակվի միայն այն բանից հետո, երբ Սահմանադրական դատարանը ստանա և ուսումնասիրի պահանջված լրացուցիչ տեղեկությունները իրավապահ մարմիններից։