Մայիսի 27-ին Հակակոռուպցիոն դատարանում նոր քրեական գործ է ստացվել Արարատի քաղաքապետարանի նախկին ղեկավարի նկատմամբ՝ պաշտոնեական լիազորությունների չարաշահման, կոռուպցիոն բնույթի գործողությունների և համայնքային շահերին ենթադրյալ վնաս պատճառելու վերաբերյալ մեղադրական եզրակացությամբ։ Գործը նույն օրը մակագրվել է և հանձնվել Հակակոռուպցիոն դատարանի քննությանը։ Iravaban.net-ը տեղեկանում է Դատալեքս դատական տեղեկատվական համակարգից։
Մեղադրական եզրակացությունը
Գլխավոր դատախազության կողմից ներկայացված մեղադրական եզրակացության համաձայն՝ Աբրահամ Սուրենի Բաբայանին մեղադրանք է առաջադրվել այն բանի համար, որ նա 2007 թվականի հուլիսի 2-ից զբաղեցնելով Արարատի մարզի Արարատ քաղաքի քաղաքապետի պաշտոնը, ՀՀ Սահմանադրության, «Տեղական ինքնակառավարման մասին» ՀՀ օրենքի 32-րդ հոդվաանի և այլ նորմատիվ իրավական ակտերի համաձայն, ի թիվս այլնի, քաղաքաշինության տնտեսության բնագավառում ունենալով իր իրավասության շրջանակում որոշումներ ընդունել, արձանագրություններ կազմելու, կարգադրություններ արձակելու, սահմանված կարգով շինարարության թույլտվություն տալու և շինարարության թույլտվությամբ նախատեսված ժամկետներում կառուցապատումն ավարտելու համար միջոցառումներ ձեռնարկելու, սահմանված կարգով ավարտված շինարարության շահագործման փաստագրումը ձևակերպելու, ինքնակամ շինարարությունը կանխարգելելու ու կասեցնելու և օրեմեքով սահմանված կարգով դրանց հետևանքները վերացնելու, կառուցապատողներին տրված ճարտարապետահատակագծային առաջադրանքով, համայնքի քաղաքաշինական կանոնադրությամբ սահմանված պահանջների կատարման նկատմամբ վերահսկողություն իրականացնելու իրավասություններ, իսկ հողօգտագործման բնագավառում’ քաղաքաշինական ծրագրային փաստաթղթերին համապատասիան, համայնքի ավագանու համաձայնությամբ և սահմանած պայմաններով, սահմանված կարգով համայնքի սեփականություն համարվող հողամասերի օտարման կամ օգտագործման տրամադրման, համայնքի վարչական սահմաններում գտնվող հողերի նպատակային օգտագործման, հողօգտագործողների կողմից հողային օրենսդրության պահանջնելի պահպանման նկատմամբ վերահսկողություն իրականացնելու լիազորություններ, այսինքն’ տեղական ինքնակառավարման մարմնում ժամանակավորապես իրականացնելով կազմակերպական-տնօրինչական և վարչատնտեսական լիազորություններ, հանդիսանալով պաշտոնատար անձ, Արարատի քաղաքապետի տեղակալ Կարեն Խաչատրյանի օժանդակությամբ անձնական այլ շահագրգովածությունից ելնելով պաշտոնեական դիրքը ծառայության շահերին հակառակ է օգտոգործել, գործողությունների կատարման արդյունքում համայնքի օրինական շահերին պատճառվել էական վնաս:
Մեղադրական հոդվածները և խափանման միջոցը
Աբրահամ Բաբայանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով և 441-րդ հոդվածի 1-ին մասով։ ափանման միջոց չի կիրառվել։
Մեղադրական հոդվածների բովանդակությունը
Պաշտոնատար անձի կողմից իր իշխանական կամ ծառայողական լիազորությունները կամ դրանցով պայմանավորված ազդեցությունն ի վնաս պետական կամ ծառայողական շահերի օգտագործելը կամ իր ծառայողական պարտականությունը չկատարելը կամ ոչ պատշաճ կատարելը կամ այնպիսի արարք կատարելը, որը չի բխում իր լիազորություններից կամ դուրս է իր լիազորությունների շրջանակից, որն էական վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին՝ պատժվում է տուգանքով՝ քսանապատիկից քառասնապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` երեքից յոթ տարի ժամկետով, կամ ազատության սահմանափակմամբ` մեկից երեք տարի ժամկետով, կամ կարճաժամկետ ազատազրկմամբ` մեկից երկու ամիս ժամկետով, կամ ազատազրկմամբ` մեկից չորս տարի ժամկետով:
Գործի հետագա ընթացքը
Գործը քննվել է Հակակոռուպցիոն կոմիտեում և 2026 թվականի մայիսի 27-ին առաջին անգամ մուտքագրվել է Հակակոռուպցիոն դատարան։ Դատալեքս դատական տեղեկատվական համակարգում գործի վարույթ ընդունելու և նախնական դատական նիստ նշանակելու վերաբերյալ տվյալներ այս փուլում հրապարակված չեն։
Ծանուցում․ Ենթադրյալ հանցանքի մեջ կասկածվողները կամ մեղադրվողները համարվում են անմեղ, քանի դեռ նրանց մեղավորությունը չի ապացուցվել օրենքով սահմանված կարգով՝ դատարանի օրինական ուժի մեջ մտած դատավճռով։