Հակակոռուպցիոն կոմիտեն (ՀԿԿ) հայտնել է ենթադրյալ ընտրակաշառքի հատկանիշով հարուցված քրեական վարույթի շրջանակներում կատարված նոր ձերբակալությունների մասին։
Կոմիտեի վարկածով՝ ձերբակալվածներն «Ուժեղ Հայաստան» դաշինքի ներկայացուցիչներ են։ Նշվում է, որ նախաձեռնված քրեական վարույթի շրջանակում իրականացվել են խուզարկություններ։
Մասնավորապես, գերատեսչությունը կուսակցության Լոռու մարզի Ալավերդիի գրասենյակի պատասխանատուին և այլ անձանց մեղադրում է Ազգային ժողովի ընտրություններում իրենց քաղաքական ուժի օգտին քվեարկելու դիմաց մի շարք քաղաքացիների ենթադրյալ ընտրակաշառք տալու մեջ։
Կոմիտեի վարկածով՝ փոխանցված ենթադրյալ գումարները ներկայացվել են որպես կուսակցության տարբեր գրասենյակներում աշխատանքի դիմաց վճարվող աշխատավարձ։
Մարտի 30-ից սկսած՝ իրավապահ մարմինները հրապարակում են հաղորդումներ, որոնցում դաշինքի ներկայացուցիչներին մեղադրում են բարեգործության, կաշառք տալու և խոստանալու մասին օրենքը խախտելու մեջ:
Ձերբակալությունների նոր ալիքն սկսվել էր մայիսի 8-ին՝ Շիրակի մարզի Անի համայնքում և Մարալիկ քաղաքում կուսակցության գրասենյակների խուզարկություններից հետո: Այս ձերբակալությունները հաջորդել էին դաշինքի վարչապետի թեկնածու Սամվել Կարապետյանի հայտարարություններին, որից հետո վարչապետ Նիկոլ Փաշինյանը դատական հայց էր ներկայացնել։
Մայիսի 12-ին Հակակոռուպցիոն կոմիտեն հայտնել էր «Ուժեղ Հայաստան» դաշինքին վերաբերող գործում նոր մեղադրանքների մասին։ Մայիսի 13-ին ՀԿԿ-ն ենթադրյալ ընտրակաշառքի գործով նոր ձերբակալությունների մասին էր հայտնել: «Ուժեղ Հայաստան»-ն այս գործողությունները քաղաքական հետապնդում է համարում և նշում, որ դաշինքը գործում է օրենքի շրջանակներում և բացառում է ընտրակաշառքի կիրառումը։
Կարդացեք նաև՝
«Ուժեղ Հայաստանին» առնչվող գործերի մեծ մասը դատարաններում չի ապացուցվում․ Կարապետյան
