Յաջորդական երկրորդ տարին ըլլալով Օքլահոմա Սիթի Թանտըրի մարզիկ Շէյ Կիլճիըս – Ալեքսանտր ընտրուեցաւ «Էն. Պի. Էյ.»-ի «Էմ. Վի. Փի.» (տարուան լաւագոյն մարզիկը):
Ան եղաւ պատմութեան 18-րդ մարզիկը, որ առնուազն երկու անգամ կը շահի այս տիտղոսը, եւ 14-րդը, որ յաջորդական երկու տարիներ կը շահի նոյն տիտղոսը:
«Պասքեթպոլը խմբային մարզախաղ է: Շնորհակալութիւն կը յայտնեմ իմ խմբակիցներուս: Ես ձեզ շատ կը սիրեմ», ըսաւ Շէյ Կիլճիըս-Ալեքսանտր:
Հետաքրքրականը հոն է, որ քանատացի մարզիկը վերջին 8-րդ տարին ըլլալով կ՛ըլլայ ոչ ամերիկացի մը, որ այս տիտղոսին կը տիրանայ:
Եաննիս Անթեթոքումփօ (Յունաստան ծնած) 2019-ին եւ 2020-ին սկսած էր այս շարքը, ապա Նիքոլա Եոքիչ (Սերպիա)` 2021-ին եւ 2022-ին, Ժոել Էմպիիտ (Քամերուն)` 2023-ին եւ անգամ մը եւս Եոքիչ` 2024-ին, շահած էին լաւագոյն մարզիկի («Էմ. Վի. Փի.) տիտղոսը:
Շէյ Կիլճիըս – Ալեքսանտրի յաջորդեցին Եոքիչ (2-րդ) եւ ֆրանսացի սենթըր Վիքթոր Ուեմպանեամա (3-րդ):
Հետաքրքրականը այն է, որ 4-րդ դիրքը գրաւող մարզիկն ալ ամերիկացի չէր, այլ սլովենիացի էր` Լուքա Տոնչիչ, մինչ 5-րդ դիրքը գրաւող մարզիկն էր ամերիկացի Քէյտ Քանինկհեմ:
«Մենք պարզապէս բախտաւոր ենք: Իբրեւ «Էն. Պի. Էյ.»-ի մարզիկ չես կրնար կառավարել այլ հասուն մարդիկ, եւ ես պարզապէս բախտաւոր եմ շատ լաւ մարդոցմով շրջապատուած ըլլալով` մարզչական խմբակ, ղեկավարութիւն, եւ մարզիկներ, որոնց հետ դաշտ կը ներկայանանք ամէն գիշեր: Մենք միշտ կ՛ուզենք տեսնել յաջորդ հերոսը, որ պիտի յաղթէ եւ տայ առաւելագոյնը` յաղթելու: Մենք նոյն նպատակը ունինք: Եւ այո՛… ես առանձին չեմ: Ասիկա ինձմէ աւելի է եւ ինձմէ մեծ բան մը», ըսաւ համեստ քանատացին: