«Reuters»-ի հրապարակման համաձայն՝ Իրանի խոշորագույն կրիպտոբորսան՝ Nobitex, 2023 թվականից առնվազն 2.3 միլիարդ դոլարի կրիպտոգործարքներ է իրականացրել «Tron» և «BNB Chain» բլոկչեյնների միջոցով։ Դրանք ստեղծվել են կրիպտոարդյունաբերության ազդեցիկ գործիչներ՝ Justin Sun-ի և Changpeng Zhao-ի հետ կապված կառույցների կողմից։
Հրապարակման մեջ նշվում է, որ նույն երկու գործարարները նաև աջակցել են Թրամփների ընտանիքի կողմից հիմնադրված World Liberty Financial կրիպտոնախագծին։ Սակայն որևէ ապացույց չկա, որ Donald Trump-ի ընտանիքը տեղյակ է եղել իրանական բորսայի գործունեության մասին։
Reuters-ը, հղում անելով «Arkham» վերլուծական ընկերության տվյալներին, գրում է, որ «Nobitex»-ը լայնորեն օգտագործվել է ինչպես Իրանի քաղաքացիների, այնպես էլ պատժամիջոցների տակ գտնվող կառույցների կողմից։ Գործարքների մի մասը կապված է եղել Իրանի Կենտրոնական բանկի և Islamic Revolutionary Guard Corps-ի հետ։
Հետաքննության համաձայն՝ միայն «Tron» ցանցով 2023 թվականից անցել է ավելի քան 2 միլիարդ դոլար, իսկ «BNB Chain»-ով՝ առնվազն 317 միլիոն դոլար։ Բացի այդ, 2025 թվականի փետրվարից՝ Իրանի և Իսրայելի միջև պատերազմի մեկնարկից հետո, տասնյակ միլիոնավոր դոլարների նոր փոխանցումներ են արձանագրվել։
«Binance»-ը և «Tron»-ը հայտարարել են, որ չեն վերահսկում բլոկչեյններում իրականացվող բոլոր գործարքները և չեն կարող հետևել յուրաքանչյուր օգտատիրոջ գործողություններին։ Միևնույն ժամանակ, «Tron»-ի ներկայացուցիչները նշել են, որ համագործակցում են իրավապահների հետ և սառեցրել են «հարյուրավոր միլիոնավոր դոլարների» կասկածելի միջոցներ։
Reuters-ը նաև հիշեցնում է, որ Թրամփի վարչակազմը վերջին տարիներին որդեգրել է կրիպտոարժույթների նկատմամբ ավելի բարենպաստ քաղաքականություն։ Այդ ընթացքում «World Liberty Financial»-ը ստացել է խոշոր ներդրումներ, այդ թվում՝ Ջասթին Սանի կողմից։ Իսկ «Binance»-ի հիմնադիր Չժաոն, որը նախկինում դատապարտվել էր ԱՄՆ-ում փողերի լվացման վերահսկողության խախտումների համար, հետագայում ներում է ստացել Թրամփից։
Հետաքննության հեղինակները նշում են, որ իրավիճակը հարցեր է առաջացնում ԱՄՆ նախագահի բիզնես շահերի և արտաքին քաղաքականության հնարավոր բախման վերաբերյալ, հատկապես այն պայմաններում, երբ Իրանի դեմ շարունակում են գործել արևմտյան պատժամիջոցները։