Պորտուգալացի անվանի մասնագետ Ժոզե Մոուրինյուն, որը համարվում է Մադրիդի «Ռեալի» գլխավոր մարզչի պաշտոնի հիմնական հավակնորդը, արդեն իսկ սկսել է թիմի կազմն ուժեղացնելու ծրագրեր կազմել։
Ինչպես The Touchline-ից փոխանցում է armsport.am-ը, ապագա մարզիչը դիմել է «սերուցքայինների» ղեկավարությանը՝ միանգամից մի քանի դիրք ամրապնդելու պահանջով։ Ըստ աղբյուրի տեղեկությունների՝ պորտուգալացին ակնկալում է թիմում տեսնել հետևյալ նոր խաղացողներին.
- Մեկ կամ երկու կենտրոնական պաշտպան
- Աջ պաշտպան
- Մեկ կամ երկու կիսապաշտպան
- Աջ եզրային հարձակվող (վինգեր)
Ավելի վաղ մամուլում շրջանառվում էին լուրեր, որ մադրիդյան ակումբն արդեն համաձայնեցրել է պայմանագրի կետերը 63-ամյա մասնագետի հետ։
Ժոզեն մադրիդյան ակումբը գլխավորել է նաև 2010-ից 2013 թվականներին։ Այդ ժամանակահատվածում նա թիմի հետ նվաճել է Իսպանիայի չեմպիոնի տիտղոսը, ինչպես նաև դարձել երկրի գավաթակիր և Սուպերգավաթակիր։ Ներկայումս պորտուգալացի մասնագետը գլխավորում է Լիսաբոնի «Բենֆիկան»։