Ռուսաստանի Ստուպինո քաղաքում իրավապահները ձերբակալել են 33-ամյա կնոջ, որը կենցաղային վիճաբանության ընթացքում պատառաքաղով վնասել է իր ծանոթին, հայտնում է Past.am-ը՝ հղում անելով Ռոսգվարդիայի Մոսկվայի մարզային վարչությանը։
Դեպքը տեղի է ունեցել Պոբեդի պողոտայում գտնվող բնակարաններից մեկում։ Ըստ նախնական տվյալների՝ երկու ընկերուհիներ միասին ալկոհոլ էին օգտագործում, երբ նրանց միջև վեճ է սկսվել։
Վիճաբանության ընթացքում կանանցից մեկը վերցրել է պատառաքաղը և հարվածել մյուսի պարանոցի հատվածին։ Տուժած կնոջը շտապ տեղափոխել են հիվանդանոց։
Հարևանները լսել են օգնության կանչերն ու անմիջապես դիմել իրավապահներին։ Ժամանած Ռոսգվարդիայի աշխատակիցները ձերբակալել են կասկածյալին և տեղափոխել ոստիկանության բաժին։
Հետագայում պարզվել է, որ կինը նախկինում ևս ներգրավված է եղել խուլիգանության հետ կապված միջադեպերում։