Ուկրաինական անօդաչու թռչող սարքերի խոշորածավալ հարվածների հետևանքով Ռուսաստանում առնվազն չորս մարդ է զոհվել՝ երեքը Մոսկվայում, մեկը՝ Բելգորոդում, հայտնում են ռուսական իշխանությունները։
Reuters-ը գրում է, որ Մոսկվան ենթարկվել է ավելի քան մեկ տարվա խոշորագույն հարձակմանը։
ՌԴ ՊՆ տվյալով՝ գիշերվա ընթացքում 556 ուկրաինական ԱԹՍ է խոցվել։
Մոսկվայի քաղաքապետ Սերգեյ Սոբյանինը հայտնել է, որ ռուսական զինուժը կեսգիշերն անց Մոսկվա ուղևորվող 81 ԱԹՍ է վնասազերծել։ Նրա խոսքոով՝ 12 մարդ է վիրավորվել, տուժել է նաև Մոսկվայի նավթային վերամշակման գործարանը, որի տեխնոլոգիական սարքավորումները, սակայն, չեն վնասվել։
ԱԹՍ բեկորներ են ընկել նաև Ռուսաստանի խոշորագույն օդանավակայանի՝ «Շերեմոտովո»-ի տարածքում, սակայն օդանավակայանին վնաս չի հասցվել։
Նախօրեին ուկրաինական ԱԹՍ-ները նույնպես հարձակողական գործողություններ էին իրականացրել։ Ստավրոպոլի երկրամասի Նևիննոմիսկ քաղաքում գիշերը մի շարք պայթյուններից հետո հրդեհ էր բռնկվել «Ազոտ» քիմիական կոմբինատում, հայտնել էին մշտադիտարկում իրականացնող տելեգրամ-ալիքները։
Ռուսական բանակը ևս նախօրեին Ուկրաինայի ուղղությամբ տարբեր տեսակի 294 անօդաչու թռչող սարք էր արձակել, որոնցից խոցվել կամ վնասազերծվել էին 269-ը։