Պակիստանի ներքին գործերի նախարար Մոհսին Ռազի Նաքվիի Թեհրան կատարած այցի նպատակն է բանակցային փաստաթղթի շուրջ համաձայնության հասնելը։ Այս մասին հայտնել է «Al Hadath» հեռուստաընկերությունը՝ հղում անելով պակիստանյան աղբյուրներին։
Նրանց խոսքով՝ «ամերիկյան կողմը խնդրել է պատասխաններ բանակցային փաստաթղթի կոնկրետ կետերի վերաբերյալ»։ Աղբյուրները նշել են, որ «Պակիստանի ներքին գործերի նախարարի Իրան կատարած այցի նպատակն է կոնկրետ համաձայնության հասնելը»։ Նրանք պնդել են, որ «դուռը բաց է չլուծված հարցերի, այդ թվում՝ միջուկային հարցի շուրջ բանակցությունների համար»։
Ավելի վաղ իրանական «Tasnim» լրատվական գործակալությունը հայտնել էր, որ Իրանի ներքին գործերի նախարար Էսկանդար Մոմենին բանակցություններ է վարել իր պակիստանցի գործընկերոջ հետ, որի ընթացքում նրանք քննարկել են Իրանի հետ հակամարտությունը լուծելու համար Միացյալ Նահանգների հետ բանակցությունների վերսկսման հեռանկարները։ Գործակալության տվյալներով՝ Պակիստանի ներքին գործերի նախարարը Թեհրան է ժամանել երկօրյա պաշտոնական այցով։