Չինաստանի արտաքին գործոց նախարարութեան բանբեր Քու Ճիա Քուն յայտնեց. «Չինաստանի եւ Միացեալ Նահանգներու միջեւ տնտեսական եւ առեւտուրի յարաբերութիւնները երկու կողմերուն համար ալ օգտակար են»:
«Չինական եւ ամերիկեան կողմերը առեւտրական ու ճարտարապետական ոլորտներուն մէջ կարեւոր համաձայնութիւններ գոյացուցին», յայտարարեց ան:
«Պատրաստ ենք բոլոր կողմերուն հետ գործակցելու` երաշխաւորելու համար համաշխարհային ուժանիւթի անվտանգութիւնն ու մատակարարման շղթայի կայունութիւնը», ըսաւ ան:
«Կարեւոր հարցը Ծոցի շրջանին եւ Միջին Արեւելքի մէջ կայունութեան երաշխաւորումն է», շեշտեց Չինաստանի արտաքին գործոց նախարարութեան բանբերը:
Ան ըսաւ, որ Իրանի դէմ պատերազմը «շրջանին մէջ աղէտներու պատճառ դարձաւ եւ վտանգաւոր հետեւանքներ ունի»:
«Պէտք է Իրանի դէմ պատերազմին շատ շուտով ելք մը գտնել, եւ պէտք չէ պատերազմին վերջ տուող եւ Հորմուզի նեղուցը վերաբացող բանակցութիւններուն հասնելու առիթը կորսնցնել», յայտնեց ան` շեշտելով. «Երկխօսութիւնն ու բանակցութիւնը պատերազմին վերջ տալու յարմարագոյն ուղին են»:
Նշենք, որ Միացեալ Նահանգներու նախագահ Տանըլտ Թրամփ երէկ իր երկօրեայ այցելութիւնը աւարտելով մեկնեցաւ Չինաստանէն:
Ան Փեքին այցելելով ամերիկեան յառաջատար ընկերութիւններու, ներառեալ «Թեսլա»-ի եւ «Ափըլ»-ի ղեկավարներուն ներկայութեան հանդիպում ունեցաւ Չինաստանի նախագահ Շի Ճինփինկի հետ, որ խոստացաւ ընդլայնել հասանելիութեան ծիրը` աւելցնելով, որ Չինաստան իր դռները լայն պիտի բանայ այդ ընկերութիւններուն դիմաց, որոնք երկրին մէջ աւելի լայն կարելիութիւններ պիտի ունենան:
Միւս կողմէ, «Սաութ Չայնա Մոռնինկ Փոսթ» օրաթերթը, վկայակոչելով իր աղբիւրները, հաղորդեց, որ Ռուսիոյ նախագահ Վլատիմիր Փութինի Չինաստան միօրեայ այցելութիւնը կը նախատեսուի 20 մայիսին:
Քրեմլին երէկ յայտարարեց. «Փութին կը յուսայ Ճինփինկի հետ Թրամփի Չինաստան այցելութիւնը քննարկել»: